लोकमत न्यूज नेटवर्क
पुणे : जिल्ह्यात ऑक्सिजनचा पुरवठा अद्यापही सुरळीत झालेला नाही. जिल्ह्याला रोज ३५० ते ३७० टन ऑक्सिजनची आवश्यकता आहे. मात्र, प्रत्यक्षात ३०० ते ३१५ टन ऑक्सिजनचा पुरवठा रोज जिल्ह्याला होत आहे. ही तूट भरून काढण्यासाठी जिल्हा प्रशासनातर्फे प्रयत्न सरू असून, मुंबई, ठाणे, मुरबाड तसेच परराज्यातून ऑक्सिजन टँकरद्वारे पुरवला जात आहे. शुक्रवारी काही गाड्यांमध्ये समस्या निर्माण झाल्याने ३१७ टन ऑक्सिजनचा पुरवठा जिल्ह्याला झाला.
जिल्ह्यासह राज्यातील अनेक शासकीय रुग्णालये, कोविड केअर सेंटर तसेच खासगी रुग्णालयांना ऑक्सिजनच्या तुटवड्याला सामोरे जावे लागत आहे. ऑक्सिजनचा तुटवडा भरून काढण्यासाठी जिल्हा प्रशासनातर्फे शर्थीचे प्रयत्न केले जात आहे. मात्र, असे असतानाही पाहिजे त्या प्रमाणात अद्यापही ऑक्सिजनचा पुरवठा होत नसल्याने रुग्णांचे हाल सुरूच आहे. ऑक्सिजन नसल्याने पुणे शहरातील काही रुग्णांना नव्या रूग्णांना दाखल करून घेण्यास अडचणी आल्या होत्या. जिल्ह्यातील अनेक तालुक्यांमध्येही ऑक्सिजनचा तुटवडा आहे. त्यात नवे प्रकल्प उभे राहण्यास विलंब लागत असल्याने त्यात आणखी भर पडत आहे.
ऑक्सिजन पुरवठा सुरळीत करण्यासाठी मुरबाड, मुंबई, ठाणे, जामनगर येथून टँकरच्या साह्याने जिल्ह्यात ऑक्सिजन आणले जात आहे. यातील काही टँकर वेळेवर पोहोचतात. मात्र, काही टँकर तांत्रिक कारणांमुळे वेळेत पोहोचू शकत नसल्याने हा तुटवडा निर्माण होत असल्याची माहिती अन्न व आैषध प्रशासन विभागाचे सहआयुक्त एस. बी. पाटील यांनी दिली.
जिल्ह्यात ऑक्सिजनचे नियोजन करण्यासाठी विभागीय आयुक्त कार्यालय, जिल्हाधिकारी कार्यालय आणि अन्न व आैषध प्रशासन विभागातर्फे ऑक्सिजन पुरवठ्याचे नियोजन केले जाते. मात्र, रुग्णांची संख्या दिवसेंदिवस वाढत असल्याने ऑक्सिजनच्या मागणीतही रोज वाढ होत आहे.
चौकट
पुण्यातील प्रकल्पांतून इतर जिल्ह्यांनाही पुरवठा
जिल्ह्यात आॅक्सिजन निर्मितीचे प्रमुख प्रकल्प आहेत, तर दोन एअर सेप्रेशन प्रकल्प आहेत. येथे निर्माण होणारा ऑक्सिजनचा पुरवठा जिल्ह्यासह आैरंगाबाद विभाग, अमरावती विभाग तसेच नागपूर विभागालाही केला जातो. यामुळे जिथे अतिरिक्त ऑक्सिजन आहे त्या ठिकाणाहून तो जिल्ह्याला पुरवला जातो. मात्र, त्या ठिकाणीही मागणी वाढल्याने ऑक्सिजनचा पुरवठा कमी प्रमाणात जिल्ह्याला होत आहे.