पुरुषोत्तम दगडू येवले (वय ७५, रा. संतोषनगर, भाम, ता. खेड) असे आत्महत्या केलेल्या सासऱ्याचे नाव आहे. तर राधिका मोरेश्वर येवले (वय ३५, रा. संतोषनगर, भाम, ता. खेड) असे सासऱ्याच्या हल्ल्यात गंभीर झालेल्या सुनेचे नाव आहे. राधिका हिच्यावर हल्ला केल्याप्रकरणी पुरुषोत्तम येवले याच्यावर चाकण पोलीस ठाण्यात गुन्हा दाखल करण्यात आला होता. कुटुंबातील वादाच्या कारणावरून बुधवारी सकाळी नऊ वाजण्याच्या दरम्यान राधिका ही घराच्या टेरेसवर कपडे वाळत घालण्यासाठी गेल्या असताना सासरा पुरुषोत्तम यांनी सुनेला जिवे ठार मारण्याच्या उद्देशाने तिच्या मानेवर, हातावर, गालावर, पायावर लोखंडी सुरीने गंभीर वार केले होते. त्यानंतर सासरे पुरुषोत्तम दुचाकीवरून पसार झाले.
संतोषनगर परिसरातील सतर्क नागरिकांनी तातडीने गंभीर जखमी झालेल्या सून राधिका यांना चाकण येथे रुग्णालयात रुग्णवाहिकेतून पाठवले. मात्र, पुणे नाशिक महामार्गावर रस्त्यात सासरे पुरुषोत्तम यांनी एका चालत्या भरधाव डंपरखाली उडी मारली होती. त्यामुळे ते गंभीर जखमी होऊन महामर्गावर बेशुद्धावस्थेत पडले. सासरा पुरुषोत्तम आणि सून राधिका या दोघांनाही येथील चाकण क्रिटिकेअर या खाजगी रुग्णालयात तातडीच्या उपचारासाठी दाखल करण्यात आले होते. सून राधिका या गंभीर जखमी असून, तिच्यावर अद्याप तातडीचे उपचार सुरु आहेत. पुरुषोत्तम येवले यांनी उपचार सुरु असताना गुरुवारी अखेरचा श्वास घेतला.