धायरी : सिंहगड रस्ता परिसरातील नऱ्हे-धायरी येथील महावितरणच्या कार्यालयात एका वरिष्ठ तंत्रज्ञाने गळफास घेऊन आत्महत्या केली आहे. उमेश प्रकाश दीक्षिवंत (वय ३२, रा. फिनोलेक्स कॉलनी, काळेवाडी, पिंपरी-चिंचवड, पुणे) असे आत्महत्या केलेल्या महावितरण कर्मचाऱ्याचे नाव आहे.
सिंहगड रस्ता पोलिसांनी दिलेल्या माहितीनुसार, उमेश दीक्षिवंत हे महावितरणच्या धायरी शाखेत कार्यरत होते. सध्या त्यांची रात्रपाळीत ड्युटी असल्याने ते नेहमीप्रमाणे शनिवारी रात्री ११ वाजता कामावर हजर झाले होते. नेहमीप्रमाणे इतर कर्मचारी कामात मग्न असताना दीक्षिवंत हे कार्यालयाशेजारी असणाऱ्या गोडावूनमध्ये गेले. सकाळी सातच्या दरम्यान एक कर्मचारी गोडाऊनमध्ये काही कामानिमित्त जात असताना त्याना आतून दरवाजा बंद असल्याचे लक्षात आले. त्यावेळी त्यांनी आवाज दिला असता दीक्षिवंत यांनी कोणताही प्रतिसाद न दिल्याने त्यांच्या सहकाऱ्याने खिडकीतून पाहिले असता त्यांनी गळफास घेतल्याचे दिसून आले. कर्मचाऱ्यांनी तातडीने वरिष्ठांना याबाबत माहिती कळविली. त्यानंतर पोलीस व अग्निशमन दलाच्या जवानांनी दरवाजा तोडून आत प्रवेश केला असता त्यांनी छताला असणाऱ्या लोखंडी अँगलला नायलॉन दोरीच्या साहाय्याने गळफास घेतल्याचे आढळून आले. याबाबत सिंहगड रस्ता पोलीस अधिक तपास करीत आहेत.
----------------
मुलीचा पहिला वाढदिवस अन् वडिलांची आत्महत्या
मूळचे उस्मानाबाद जिल्ह्यातील असणारे उमेश दीक्षिवंत हे कोल्हापूरवरून मागील दोन वर्षांपूर्वी बदली होऊन महावितरणच्या धायरी शाखेत रुजू झाले होते. मनमिळावू स्वभावाचे असणारे दीक्षिवंत यांचे दोन वर्षांपूर्वी लग्न झाले असून, ते काळेवाडी परिसरात आपल्या पत्नीसमवेत राहत होते. त्यांना एक वर्षाची मुलगी असून तिचा आज पहिला वाढदिवस होता. मुलीच्या वाढदिवशी दीक्षिवंत यांनी आत्महत्या केल्याने कर्मचाऱ्यांनी हळहळ व्यक्त केली. त्यांनी आत्महत्या करण्याइतके टोकाचे पाऊल का उचलले याचे कारण अद्याप समजू शकले नाही.
--------------------
फोटो: उमेश दीक्षिवंत