पुणे : शहरातील विविध भागांमधून गेल्या वर्षभरात महिलांच्या गळ्यातील सोन्याचा ऐवज लंपास करणार्या ५ जणांच्या इराणी टोळीला गुन्हे शाखेच्या पोलिसांनी जेरबंद केले आहे. या टोळीकडून शहरातील २२ गुन्हे उघडकीस आणण्यात यश आले असून, पोलिसांनी २१ लाखांचा ऐवज हस्तगत केला आहे. मोहमद फिरोज खान ऊर्फ इराणी (वय १९, रा. पाटील इस्टेट, शिवाजीनगर), हैदरअली अब्बासअली सिया (वय २५, रा. सय्यदनगर, हडपसर), खमरअली फिरोजअली शेख (वय २०, रा. पापानगर, भुसावळ), रोशन अली जावेदअली शेख (वय १९, रा. शिवाजीनगर, परळी वैजनाथ), फिरोज खानू खान (वय ४२, रा. दत्तवाडी, कुसगाव मंदिरामागे, लोणावळा) अशी अटक करण्यात आलेल्या आरोपींची नावे आहेत. त्यांना न्यायालयाने १२ मेपर्यंत पोलीस कोठडी सुनावली आहे. चोरीचे दागिने खरेदी करणारा सराफ सुनील वामन मानगावकर (वय ४५, रा. शाहुनगर, जयसिंगपूर, कोल्हापूर) यालाही अटक करण्यात आली आहे. इराणी टोळीचे गुन्हेगार चिंचवड येथे येणार असल्याची माहिती गुन्हे शाखेच्या पोलिसांना खबर्यामार्फत मिळाली होती. त्यानुसार त्यांना सापळा रचून पकडण्यात आले. त्या वेळी त्यांच्याकडून २ मोटारसायकली हस्तगत करण्यात आल्या. पोलीस कोठडीमध्ये असताना आरोपींकडे केलेल्या तपासात सोनसाखळीचोरीचे २२ गुन्हे उघडकीस आले. उघडकीस आणण्यात आलेले सर्व गुन्हे या वर्षीचे आहेत. (प्रतिनिधी)
सोनसाखळ्या चोरणारी इराणी टोळी जाळ्यात
By admin | Updated: May 8, 2014 01:55 IST