लोकमत न्यूज नेटवर्क
पुणे : हवेली तालुक्यातील अंतुलेनगर पिसोळी येथील कुष्ठरोग बांधवांच्या वसाहतीच्या प्रश्नाबाबत महाराष्ट्र राज्याचे विधान परिषदेचे विरोधी पक्षनेते प्रवीण दरेकर यांना निवेदन देण्यात आले. यावेळी कुष्ठरोग बांधवांचे प्रश्न मार्गी लावण्याची मागणी करण्यात आली.
वसाहतीमध्ये तेथील नागरिकांचे वास्तव्य पन्नास वर्षांपासूनचे आहे. त्या शेजारीच त्यांच्यावर उपचार घेण्यासाठी डॉक्टर बंडोरवाला लेप्रसी हॉस्पिटल अस्तित्वात आहे. त्यामुळे त्यांना सदर ठिकाणी उपचार घेऊन राहणे व काम करणे सोयीचे आहे. एकाच ठिकाणी राहणे, उपचार व रोजगार असल्यामुळे त्यांना उपजीविका करणे सोयीस्कर झाले आहे. साधारणत: पन्नास वर्षांपूर्वी माजी मुख्यमंत्री अंतुलेसाहेब यांनी वन खात्यामार्फत त्यांच्यावर कारवाई करण्यासाठी आले असता कुष्ठरोग बांधवांना या ठिकाणी राहण्याची परवानगी दिली आहे. त्यानुसार ते सदर ठिकाणी राहत असून घराचा टॅक्स, लाईटबिल नियमितपणे भरत आहेत. परंतु येथील नागरिकांना वन विभागामार्फत घरे रिकामी करावयाची नोटीस देण्यात आली आहे. सदर बाबतीत लक्ष घालून सदर कार्यवाही थांबवावी अशी मागणी केली. पश्चिम महाराष्ट्र भारतीय जनता पार्टीचे अध्यक्ष जालींदर कामठे यांनी हे निवेदन दिले. एकाही घराला धक्का लागू देणार नाही, असे आश्वासन प्रवीण दरेकर यांनी अंतुलेनगर येथील उपस्थित नागरिकांना दिले. या वेळी भाजप जिल्हाध्यक्ष गणेश भेगडे, पन्नालाल निकम, नरेंद्र मरळ व अंतुलेनगर भागातील नागरिक उपस्थित होते.