लोकमत न्यूज नेटवर्क
पुणे : एकतर्फी प्रेमातून खडकवासलाजवळील कोल्हेवाडी येथे कारमधून जाणार्‍यावर गोळीबार करण्याचा प्रकार घडला. याप्रकरणी हवेली पोलिसांनी एकाला अटक केली आहे.
अक्षय ऊर्फ रावण चंद्रकांत दुबे (रा. कोल्हेवाडी) असे अटक केलेल्याचे नाव आहे. याप्रकरणी कोल्हेवाडीत राहणार्‍या ४५ वर्षांच्या व्यक्तीने हवेली पोलिसांकडे फिर्याद दिली आहे. फिर्यादी हे २६ मे दुपारी ४ वाजता कोल्हेवाडी येथील एका हॉटेलसमोर असताना त्यांना अक्षय ऊर्फ रावण दिसला. त्यांनी ‘तू आमच्या नातेवाईक महिलेला त्रास का देतो’ असे विचारले. त्यावरून त्याने फिर्यादीशी झटापट करून रिव्हॉल्व्हर रोखली. याप्रकरणी तक्रार करण्यासाठी फिर्यादी कारमधून पोलीस ठाण्याकडे येत होते. वाटेत किरकटवाडी फाटा येथे अक्षय याने फिर्यादीवर गोळी झाडून जीवे मारण्याचा प्रयत्न केला.
याबाबत हवेली पोलीस ठाण्याचे वरिष्ठ पोलीस निरीक्षक सदाशिव शेलार यांनी सांगितले की, एकतर्फी प्रेमातून हा प्रकार घडला असून आरोपीला अटक केली आहे.