पुणे : “शरद पवार हे धोकेबाज नेते नाहीत. ते देशाचे नेते आहेत. राष्ट्रपतिपदाचे उमेदवार पवार असतील तर आमच्या शुभेच्छा असतील. मात्र, ते निवडून येणार नाहीत. त्यांना उगीच बळीचा बकरा करू नये,” असे केंद्रीय समाजकल्याण राज्यमंत्री रामदास आठवले यांनी सांगितले.
पुणे दौऱ्यावर असलेल्या आठवले यांनी शुक्रवारी (दि. १६) पत्रकारांशी संवाद साधला. त्यावेळी ते बोलत होते. महापौर मुरलीधर मोहोळ, उपमहापौर सुनीता वाडेकर, सभागृह नेते गणेश बिडकर, नगरसेवक डॉ. सिद्धार्थ धेंडे यावेळी उपस्थित होते.
आठवले म्हणाले, “ओबीसी समाजाची जनगणना आवश्यक आहे. जातनिहाय जनगणना झाल्याने जातीयवाद वाढेल या मताचा मी नाही. जातनिहाय जनगणना झाली तर कोणत्या जातीला किती प्रतिनिधित्व द्यायचे हे नेमकेपणाने ठरविता येईल.” ओबीसींचा डेटा अंदाजे तयार करण्यात आलेला आहे. त्यामुळे केंद्र सरकार तो देत नाही, असे आठवले यांनी स्पष्ट केले.
आठवले म्हणाले की, शरद पवार यांच्यामुळे सत्तास्थानी आलेल्या उद्धव ठाकरे सरकारमध्ये ताळमेळ नाही. बाळासाहेब ठाकरे यांचे स्वप्न साकार करण्यासाठी शिवसेनेने भाजपसोबत यावे. विधानसभा अध्यक्षांची निवडणूक आमदार फुटतील या भीतीने पुढे ढकलण्यात येत आहेत. मराठा आरक्षणाचे अधिकार राज्याला देण्यासाठी संसदेने ठराव मंजूर करावा, अशी मागणी आम्ही केली आहे. ईडी कारवाईशी केंद्र सरकारचा काही संबंध नाही, असे त्यांनी सांगितले.
चौकट
आरपीआय पुण्यात भाजपासोबतच
“पुणे महापालिकेची निवडणूक भाजपसोबत लढणार आहोत. पुन्हा आमचीच सत्ता येईल. भाजपामुळे रिपाइंला उपमहापौरपद मिळाले. शिवसेना, काँग्रेस व राष्ट्रवादी वेगवेगळे लढले तर आम्ही त्यांच्यावर मात करू. पालिका निवडणूक भाजपाच्या कमळ चिन्हावरच लढवणार असलो तरी विधानसभा निवडणूक आमच्या चिन्हावर लढविण्याचा प्रयत्न आहे.”
-रामदास आठवले, अध्यक्ष, रिपब्लिकन पार्टी ऑफ इंडिया