देशातील मोजक्याच महाविद्यालयांना सदर योजनेकरिता निवडले जाते. या महाविद्यालयातील सूक्ष्मजीवशास्त्र, रसायनशास्त्र व वनस्पतिशास्त्र या विभागांना सदर योजनेकरिता निवडले गेले आहे. या योजनेअंतर्गत महाविद्यालयाला ४५ ते ५० लाख इतके अनुदान प्राप्त होणार असून महाविद्यालयातील सदर विभागातील पदवी शिक्षण घेणाऱ्या विद्यार्थिनींना याचा फायदा होणार आहे.
‘डीबीटी स्टार कॉलेज’ योजनेकरिता निवड झाल्याने महाविद्यालयातील विभागाचे उपकरणीय दृष्टिकोनातून सबलीकरण होणार आहे. त्याचा प्रत्यक्ष फायदा हा विद्यार्थिनींना नवनवीन प्रयोग व संशोधन आधारित प्रकल्प राबविण्याकरिता होणार आहे. पदवी शिक्षण घेणाऱ्या विद्यार्थिनींकरिता, त्यांच्या सर्वांगीण विकासासाठी, विविध चर्चासत्रे, परिषदा, प्रशिक्षणे आयोजन करण्याकरिता किंवा भाग घेण्याकरिता सदर योजनेचा उपयोग केला जातो, अशी माहिती योजनेचे समन्वयक व उपप्राचार्य डॉ. श्रीकुमार महामुनी यांनी दिली. शारदाबाई पवार महिला महाविद्यालयातील सूक्ष्मजीवशास्त्र, रसायनशास्त्र व वनस्पतिशास्त्र या तीनही विभागांतील अध्यापक व विद्यार्थी संशोधनामध्ये अग्रेसर भूमिका बजावत आहेत. मातृसंस्था अ‍ॅग्रीकल्चरल डेव्हलपमेंट ट्रस्टच्या माध्यमातून शेतीजन्य विकासावर संशोधन करीत आहेत. आजपर्यंत या विभागातील विद्यार्थिनी व प्राध्यापकांनी ६० पुस्तके आणि ५८५ संशोधन लेख राष्ट्रीय व आंतरराष्ट्रीय जर्नल्स-नियतकालिकांमध्ये प्रकाशित केले आहेत. संस्थेकडे उत्कृष्ट पायाभूत व वैज्ञानिक सुविधा असल्यामुळे संशोधनास विद्यार्थ्यांना राष्ट्रीय प्रयोगशाळेसारखी सुविधा बारामतीमध्ये मिळू लागली आहे.