पुणे : वाघोली येथील एम. बी. अष्टेकर ज्वेलर्स या दुकानातून तब्बल दीड कोटी रुपयांचे ३ किलो ११ ग्रॅम सोन्याचे दागिन्यांचा अपहार करणा-या सेल्समनला लोणी कंद पोलिसांनी अटक केली.
प्रवीण रामभाऊ मैड (वय ३३, रा. शिक्रापूर, ता. शिरूर) असे अटक केलेल्या सेल्समनचे नाव आहे. याप्रकरणी तुषार अष्टेकर (वय३५, रा. सदाशिव पेठ) यांनी लोणी कंद पोलिसांकडे फिर्याद दिली आहे. हा प्रकार २ ते ९ फेब्रुवारी दरम्यान घडला.
वाघोली येथील अष्टेकर यांच्या सराफी दुकानात प्रवीण मैड हा सेल्समन म्हणून कामाला होता. त्याच्याकडे अष्टेकर यांनी सोन्याचे काऊंटर सांभाळायला दिले होते. त्यादरम्यान त्याने १ कोटी ४९ लाख रुपयांचे ३ किलो ११ ग्रॅम वजनाच्या सोन्याच्या दागिन्यांचा अपहार केला. लोणी कंद पोलिसांनी त्याला अटक करून न्यायालयात हजर केले असता न्यायालयाने अधिक तपासासाठी ७ दिवसांची पोलीस कोठडी मंजूर केली.