खवले मांजराच्या विक्रीवर बंदी आहे. अंधश्रद्धेपोटी गेल्या काही वर्षांत खवले मांजर बाळगले जाण्याचे प्रमाण वाढले आहे. परदेशात तस्करी करून खवले मांजर विक्रीस पाठविले जाते. पुणे-नाशिक रस्त्यावर असलेल्या संगमनेर तालुक्यातील घारगाव परिसरात खवले मांजराची विक्री करण्यासाठी काहीजण येणार असल्याची माहिती वनविभागाच्या पुणे कार्यालयातील उपवनसंरक्षक राहुल पाटील यांना मिळाली. त्यानंतर वनविभागाच्या पथकाने तेथे सापळा लावून महेंद्र मच्छिंद्र केदार (वय २५), सागर भीमाजी डोके (वय २५, दोघे रा. साकूर, ता. संगमनेर, जि. अहमदनगर) अशोक दादा वारे (वय २९, रा. तहराबाद, ता. राहुरी, जि. अहमदनगर), अनिला धोंडिबा भालेकर (वय ६१, रा. विठ्ठलवाडी, ता. जुन्नर, जि. पुणे) यांना अटक करण्यात आले आहे.
आंबेगाव तालुक्याच्या पश्चिम भागातील पाटण खो-यामध्ये असणा-या साकेरी येथील वनखंड १३४ येथून खवले मांजराची तस्करी करण्यात आली होती. सदर आरोपींनी हे खवले मांजर विक्रीसाठी संगमनेर तालुक्यातील घारगाव येथे आणणार असल्याची खबर मिळताच वनविभागाच्या पथकाने छापा टाकून आरोपींसह जिवंत खवले मांजर पकडले.
यानंतर हे खवले मांजर बाराज्योतीर्लिंगापैकी एक असणा-या श्री क्षेत्र भीमाशंकर येथील अभयारण्यामध्ये सोडण्यात आले.
अंधश्रद्धेपोटी पकडलेल्या खवले मांजराची सुटका वनविभागाने करून पुन्हा श्री क्षेत्र भीमाशंकर येथील अभारण्याच्या निसर्ग सहवासात सोडण्यात आले.