लोकमत न्यूज नेटवर्क
सासवड : सासवड नगरपालिकेच्या उपनगराध्यक्ष वसुधा आनंदे व स्वीकृत नगरसेवक संजय चवरे, बाळासाहेब पायगुडे यांनी राजीनामा दिल्याने रिक्त झालेल्या जागेवर सासवड नगरपालिकेच्या सभागृहात मंगळवारी (दि. १७) सदस्यांची बैठक झाली. यात उपनगराध्यक्षपदी पुष्पाकाकी जगताप यांची तर स्वीकृत नगरसेवकपदी सागर जगताप आणि संदीप राऊत यांचा निर्धारित वेळेत प्रत्येक एकच अर्ज आल्याने त्यांची बिनविरोध निवड झाल्याचे पीठासीन अधिकारी तथा नगराध्यक्ष मार्तंड भोंडे यांनी जाहीर केले.
निवडणूक निर्णय अधिकारी तथा नगरपालिकेचे प्रभारी मुख्याधिकारी सूर्यकांत पठाडे, गटनेत्या आनंदीकाकी जगताप, नगरसेवक अजित जगताप, दिपक टकले, सचिन भोंगळे, संदीप जगताप, मनोहर जगताप उपस्थित होते. जनमत विकास आघाडीचे वतीने नवनिर्वाचित पदाधिकारी यांना या वेळी शुभेच्छा देण्यात आल्या. उपनगराध्यक्ष पुष्पा जगताप यांनी निवडीबद्दल जिल्हा काँग्रेसचे अध्यक्ष आमदार संजय जगताप, गटनेत्या आनंदीकाकी जगताप आणि सर्व सदस्यांचे आभार मानले. या प्रसंगी सुहास लांडगे, संजय ग. जगताप, प्रवीण भोंडे, नगरसेविका माया जगताप, सीमा भोंगळे, निर्मला जगताप, सारिका हिवरकर, विद्या टिळेकर, मंगल म्हेत्रे, डॉ. अस्मिता रणपिसे यांसह पालिकेच्या सर्व विभागांचे प्रमुख, जनमत विकास आघाडीचे अनेक कार्यकर्ते आदी उपस्थित होते.
फोटोओळी : सासवड नगरपालिकेत उपनगराध्यक्ष आणि स्वीकृत नगरसेवकांच्या सत्कारप्रसंगी मार्तंड भोंडे, आनंदीकाकी जगताप आणि सर्व नगरसेवक.