पुणे : उद्योग क्षेत्रातील अतुलनीय योगदानाद्वारे पुण्याचे नाव देशासह जगभरात पोहोचविणारे भारत फोर्ज लिमिटेडचे अध्यक्ष आणि व्यवस्थापकीय संचालक बाबासाहेब नीळकंठ कल्याणी यांना यंदाचा पुण्यभूषण पुरस्कार पुरस्कार जाहीर झाला आहे.
डॉ. रघुनाथ माशेलकर यांच्या अध्यक्षतेखालील निवड समितीने त्यांना हा पुरस्कार देण्याचे निश्चित केले आहे. कोविड-१९ चे संकट कमी झाल्यानंतर एका खास समारंभात हा पुरस्कार सोहळा होईल. त्याच वेळी स्वातंत्र्यसैनिक आणि सीमेवर लढताना जखमी झालेल्या काही जवानांनाही गौरवणार असल्याचे संस्थेचे अध्यक्ष डॉ. सतीश देसाई यांनी मंगळवारी (दि.२३) सांगितले.
बाबा कल्याणी यांच्या नावाची निवड ही गेल्या वर्षीच केली होती, पण कोविड-१९च्या वाढत्या संकटामुळे गेल्या वर्षी हा पुरस्कार जाहीर केला नाही. पुरस्काराचे यंदाचे ३२ वे वर्ष असून, स्मृतिचिन्ह आणि १ लाख रूपये असे पुण्यभूषण पुरस्काराचे स्वरूप आहे. बाबासाहेब नीळकंठ कल्याणी हे एकूण ३.० बिलीयन डॉलर्सची उलाढाल असणाऱ्या कल्याणी ग्रुप या अग्रगण्य कंपनी असलेल्या भारत फोर्ज लिमिटेडचे अध्यक्ष आणि व्यवस्थापकीय संचालक आहेत.
यावेळी धरमवीर सिंग (नाईक), सुरेश कुमार कर्की (नाईक), के. नागी रेड्डी ( शिपाई), हौसाबाई पाटील (सातारा) आणि माधवराव माने (सांगली) यांना सन्मानित करण्यात येणार आहे.