दौंड : पंतप्रधान नरेंद्र मोदी यांच्यावर माझा विश्वास आहे. त्यानुसार मला केंद्रात मंत्रिपद देण्याची हमी त्यांनी दिली असल्याचा विश्वास रिपब्लिकन पार्टी आॅफ इंडियाचे राष्ट्रीय अध्यक्ष तथा खासदार रामदास आठवले यांनी पत्रकार परिषदेत व्यक्त केला. दौंड येथे पत्रकार परिषदेत ते बोलत होते. देशात आणि राज्यात महायुतीची सत्ता आल्यामुळे सत्तेत असणाऱ्यांना चांगले दिवस आले आहेतच; परंतु सर्वसामान्य जनतेलादेखील चांगले दिवस येतील. रिपब्लिकन पार्टी आॅफ इंडिया सर्व जाती-धर्मांतील लोकांना सहभागी करून घेणारी आहे. ज्यामुळे आरपीआय पक्ष आहे त्यापेक्षा अधिक भक्कमपणे उभा राहण्यास मदत होईल. शेतकऱ्यांच्या पडीक जमिनी भूसंपादनासाठी घ्या; मात्र जिथे मुबलक पाणी आहे आणि शेती व्यवसाय जोमात आहे अशा जमिनी सरकारने घेऊ नयेत. ज्या जमिनी संपादित केल्या, त्यांना चांगला भाव दिला पाहिजेत. जोपर्यंत पर्यायी जागा मिळत नाही, तोपर्यंत रेल्वे झोपडपट्टी हटवू देणार नाही. रेल्वेमंत्री सुरेश प्रभू यांच्याशी चर्चादेखील केली आहे, असे आठवले म्हणाले. (वार्ताहर)
मंत्रिपदाची पंतप्रधानांनी दिली हमी : आठवले
By admin | Updated: April 9, 2015 05:11 IST