रेशनकार्डांचे बेसुमार वाटप

अन्नधान्य वितरण कार्यालयाच्या ९ परिमंडळ कार्यालयांमध्ये आंबिल ओढा येथील ह कार्यालयाने गेल्या ७ महिन्यांमध्ये तब्बल १६ हजार ३०० रेशनकार्डांचे बेसुमार वाटप करून एक नवा विक्रम प्रस्थापित केला आहे.

पुणे : अन्नधान्य वितरण कार्यालयाच्या ९ परिमंडळ कार्यालयांमध्ये आंबिल ओढा येथील ह कार्यालयाने गेल्या ७ महिन्यांमध्ये तब्बल १६ हजार ३०० रेशनकार्डांचे बेसुमार वाटप करून एक नवा विक्रम प्रस्थापित केला आहे. आंबिल ओढा कार्यालयाकडून एवढ्या मोठ्या प्रमाणात रेशनकार्ड का घेतले जात आहेत, त्यांच्याकडून व्यवस्थित वाटप झाले आहे का, याची चौकशी करण्याची गरज अद्याप अन्नधान्य वितरण कार्यालयास वाटलेली नाही. परिमंडळ ह कार्यालयातून कोरे रेशनकार्ड गहाळ होणे, कागदपत्रांची व्यवस्थित पूर्तता केली नसतानाही कागदपत्रांचे वाटप करणे, सहायक परिमंडळ अधिकार्‍यांना रेशनकार्डवर सही करण्याचे अधिकार नसताना बेकायदेशीरपणे सह्या करून रेशनकार्डांचे वाटप करणे, असे असंख्य गैरप्रकार उजेडात आले. या पार्श्वभूमीवर लोकहित फाउंडेशनचे अध्यक्ष अजहर खान यांनी अन्नधान्य वितरण कार्यालयाकडून सप्टेंबर २०१३ ते मार्च २०१४ या ७ महिन्यांच्या काळात शहरातील ८ परिमंडळ कार्यालयांना किती रेशनकार्डांचे वाटप केले याची माहिती घेतली. परिमंडळ ह कार्यालयाने सरासरी दिवसाला १०० रेशनकार्डांचे वाटप करून एक नवा विक्रम प्रस्थापित केला असल्याचे आढळून आले आहे. या कार्यालयाकडून पिवळे, केशरी व शुभ्र अशा १६ हजार ३०० रेशनकार्डांचे वितरण करण्यात आले आहे. त्यानंतर इ परिमंडळाने ६ हजार ५५०, फ परिमंडळाने ५३९३, क परिमंडळाने ४ हजार ७५९, अ परिमंडळाने ४ हजार ५५० रेशनकार्डांचे वितरण केले आहे. ग परिमंडळ कार्यालयाने सर्वात कमी ६५० रेशनकार्डांचे वितरण केले आहे. परिमंडळ कार्यालयाकडून आलेल्या मागणीनुसार अन्नधान्य कार्यालयाकडून त्यांना रेशनकार्ड दिले जाते. मात्र कोणत्या कार्यालयास किती रेशनकार्ड दिले, त्याचा त्यांनी व्यवस्थित लेखाजोखा ठेवला आहे का, याची मात्र कोणतीही तपासणी केली जात नसल्याचे आढळून आले आहे. (प्रतिनिधी)