पुणे : लांबपल्ल्याच्या मार्गावरील प्रवास जलद गतीने होण्यासाठी पुणे महानगर परिवहन महामंडळाने ११ प्रमुख मार्गांवर जलद बससेवा सुरू करण्याचा निर्णय घेतला आहे. या मार्गांवर ई-बस सोडण्यात येणार असून केवळ ठराविक थांब्यांवरच बस थांबविली जाणार आहे. ही सेवा २५ डिसेंबरपासून सुरू होणार असल्याची माहिती पीएमपीचे अध्यक्ष व व्यवस्थापकीय संचालक राजेंद्र जगताप यांनी दिली.
पीएमपीकडून लांबपल्ल्याच्या अनेक मार्गांवर बस सोडण्यात येतात. पण अनेक थांबे असल्याने या मार्गांवर शेवटच्या थांब्यापर्यंत पोहण्यासाठी बराच वेळ जातो. तसेच या बसला गदीर्ही वाढते. या पार्श्वभुमीवर पीएमपी प्रशासनाने प्रायोगिक तत्वावर ११ मार्गांवर जलद बससेवा सुरू करण्याचा निर्णय घेतला आहे. या मार्गांवर काही प्रमुख थांब्यांवर बस थांबविणार आहे. म्हणजे कात्रज ते निगडी या मार्गावर पूर्वी ५९ थांबे होते. आता केवळ १३ मार्गांवरच बस थांबेल. त्यासाठी तिकीट दरात कोणताही बदल करण्यात आलेला नाही.
जलद बससेवेमुळे प्रवाशांचा प्रवासाचा वेळ कमी होणार आहे. अशी सेवा यापुर्वीच मुंबईत बेस्टने सुरू केली आहे. पुण्यामध्ये पहिल्यांदाच ही सेवा सुरू होत आहे. प्रवासी वाढ करण्यासाठीही या सेवेचा फायदा होणार आहे. या मार्गांवर ३० ते ६० मिनिटांदरम्यान प्रवाशांना बस उपलब्ध होऊ शकेल, असे जगताप यांनी सांगितले.
--
जलद बस मार्ग व वारंवारिता
मार्ग (कंसात मार्ग क्रमांक) वारंवारिता (मिनिटे)
कात्रज ते निगडी (४२) ४५
भेकराऊनगर ते एनडीए गेट (६४ ब) ४०
भेकराईनगर ते निगडी (१३९ अ) ६०
भेकराईनगर ते निगडी (१४९) ४०
भेकराईनगर ते आळंदी (२०१) ४५
भेकराईनगर ते चिंचवडगांव (२०४) ४०
भेकराईनगर ते हिंजवडी माण फेज ३ (२०८) ६५
भेकराईनगर ते कात्रज (३०१) २५
निगडी ते वाघोली (३३६) ५०
निगडी ते पुणे स्टेशन (३४८) ४५
निगडी ते हिंजवडी (३७२) ४०