पिंपरी : पिंपरीगाव व संभाजीनगर, चिंचवड येथे बांधण्यात येणार्‍या जलतरण तलाव उन्हाळ्याचा हंगाम संपत आला तरी अद्याप अपूर्ण अवस्थेत आहे. करोडोंचा खर्च करूनही ही स्थिती असल्याने जलतरण शौकिनांमध्ये नाराजीचा सूर आहे. महापालिकेचे शहरात नेहरुनगर, मोहननगर, केशवनगर, प्राधिकरण, यनुनानगर, पिंपळे गुरव, सांगवी, कासारवाडी, भोसरी, थेरगाव या ठिकाणी असे एकूण १० सार्वजनिक तलाव आहेत. पिंपरीगाव व संभाजीनगर, चिंचवड येथे नव्याने दोन तलाव बांधण्यात येत आहेत. दोन वर्षांपेक्षा अधिक काळापासून हे काम संथ गतीने सुरू आहे. सध्या ते अर्धवट स्थितीत पडून आहे. पिंपरीगावात पवना नदीकाठी तलाव बांधण्याचे काम बंद पडले आहे. तलावाकडे जाण्यासाठी रस्ताच उपलब्ध नाही. नदीच्या कडेने असलेला रस्ता बंद केला आहे. उद्यानाच्या बाजूने जाण्यास अरुंद व अपुरा रस्ता आहे. नव्या व्यक्तीस खूप शोध घेतल्यानंतर या ठिकाणी जाता येते. केवळ तलावाचा २५ बाय १६ मीटरचा हौद बांधला आहे. तळाची खोली साडेतीन ते सहा फूट आहे. मात्र, परिसरात सीमा भिंतीशिवाय काहीच नाही. राडारोडा पडला असून, काम बंद असल्याने झाडेझुडपे उगवले आहे. टवाळ तरुण रात्रीच्या वेळी या ठिकाणी मद्यपान आणि अवैध धंद्यासाठी याचा वापर करत आहेत. परिसरात दारूच्या बाटल्यांचा ढीग पडला आहे. काम बंदस्थितीत आहे. संभाजीनगर येथील शिव-शाहू- संभाजी उद्यानामागील (बर्ड व्हॅली) असलेल्या उद्यानाजवळ तलावाचे काम अपूर्ण अवस्थेत आहे. तलावाचा हौद तसेच, शॉवर रुम व कपडे बदल्याचे रुम अर्धवट स्थितीत आहेत. काम सुरू झाल्यापासून बांधकाम कासव गतीने सुरू आहे. सध्या ते बंद स्थितीत आहे. दोन्ही तलावास सुमारे अडीच कोटी इतका खर्च करण्यात आला आहे. महापालिकेच्या स्थापत्य विभागाच्या दुर्लक्षामुळे काम बंद पडले आहे. उन्हाळ्याचा हंगामात हे दोन्ही तलाव खुले होणार होते. मात्र, हंगाम संपत आला तरी काम अपूर्ण आहे. त्यामुळे परिसरातील स्थानिक नागरिकांमध्ये नाराजी आहे. येथील नागरिकांना नाईलाजास्तव दूर अंतरावरील तलावावर पोहण्यास जावे लागत आहे.(प्रतिनिधी)
पिंपरी, संभाजीनगरचा तलाव हंगाम संपला तरी अपूर्णच!
By admin | Updated: May 27, 2014 07:00 IST