पुणे शहरासाठीच्या उरळी-फुरसुंगी कचरा डेपोसाठी जमीन संपादित केलेल्या जमीन धारकांच्या पात्र वारसांना पुणे महानगरपालिकेत बिगारी संवर्गातील पदावर कायमस्वरूपी नोकरी देण्याचा निर्णय मंत्रिमंडळाच्या बैठकीत घेण्यात आला.
पुणे शहरातील कचरा टाकण्यासाठी 1989 आणि 2005 मध्ये पुणे जिल्ह्यातील उरळी-फुरसुंगी येथे एकूण 163 एकर जमीन संपादित करण्यात आली होती. या जागेवर पुणे शहरातील कचरा टाकण्यात येत असून यासंदर्भात मध्यंतरी आंदोलनही झाले होते. तसेच या डंपिंग ग्राऊंडसाठी ज्यांच्या जमिनी संपादित झाल्या आहेत अशा धारकांच्या कुटूंबातील व्यक्तींना पुणे महानगरपालिकेत नोकरी द्यावी, अशी मागणी आंदोलकांकडुन करण्यात आली होती.
पुणे महानगरपालिकेने यापूर्वी 2010-11 च्या दरम्यान एकवट वेतनावर बाधित कुटुंबातील 57 व्यक्तींना तात्पुरत्या स्वरुपात नियुक्ती दिली आहे. यासाठीच 26 ऑगस्ट 2014 च्या आदेशान्वये पुणे महानगरपालिकेच्या आस्थापनेवर 62 बिगारी संवर्गातील पदांची निर्मिती केलेली आहे. त्यानुसार आजच्या बैठकीत बाधित कुटुंबातील एका व्यक्तीस याप्रमाणे एकूण 57 कार्यरत व्यक्तीस आदेशाच्या दिनांकापासून पुणे महानगरपालिकेच्या सेवेत कायमस्वरुपी सामावून घेण्यास मान्यता देण्यात आली.
सेवेत सामावून घेताना या कर्मचाऱ्यांना आदेशाच्या दिनांकापूर्वीच्या कालावधीचे वेतन व भत्ते यामधील फरकाचे किंवा इतर लाभ लागू असणार नाहीत. तसेच 57 वारसांना पुणे महानगरपालिकेच्या सेवेत कायमस्वरुपी नियुक्ती देताना संबंधितांकडून सादर केलेल्या प्रमाणपत्रांची खात्री जिल्हाधिकारी स्तरावरुन करुन घेण्यात येणार आहे.