लोणी कंद : गावातील पानंद रस्ते, शिव रस्ते, शेतातील बांधावरचे रस्ते यातील अनेक वर्षातील, भावाभावांतील संघर्ष भावकीतील वाद कोर्टकचेरी यात वर्षानुवर्षे पिचलेल्या शेतकरी बांधवांना आशेचा किरण दिसला. केसनंद (ता. हवेली) येथे अनेक वर्षे प्रलंबित असलेला पाणंद रस्ता खुला करुन जिल्हाधिकारी डॉ. राजेश देशमुख यांनी या रस्ते सर्वासाठी खुले केले. या कामामुळे सुमारे ३०० एकर क्षेत्रातील शेतकऱ्यांनी मोकळा श्वास घेतला.
जिल्हाधिकारी डॉ. राजेश देशमुख
यांनी आज कोणताही गाजावाजा न करता महसूल विभागाच्या अधिकारी कर्मचारी सह केसनंद येथे दाखल झाले. येथील पूर्व तसेच पश्चिमेकडील एकूण ३०० एकर क्षेत्राला फायदेशीर अशा एक किलोमीटर लांबीच्या रस्त्यामुळे येथील ५० शेतकऱ्यांचा प्रश्न सुटला आहे. या रस्त्याअभावी शेतकऱ्यांना मोठ्या अडचणींचा सामना करावा लागत असे.
या रस्त्याच्या कामाच्या शुभारंभप्रसंगी उपजिल्हाधिकारी संजय तेली, उपविभागीय अधिकारी सचिन बारवकर, तहसीलदार विजयकुमार चोबे, हवेलीचे गटविकास अधिकारी प्रशांत शिर्के, तालुका वैद्यकीय अधिकारी डॉ. सचिन खरात, पवनकुमार शिवले, पोलिस निरीक्षक प्रताप मानकर, माजी सरपंच मिलींदनाना हरगुडे, तानाजी हरगुडे, एस.पी हरगुडे, संतोष हरगुडे, सरपंच सौ. रोहिणी सचिन जाधव, उपसरपंचसुनिता दिनेश झांबरे, ग्रामविकास अधिकारी गणेश वालकोळी तसेच सर्व सदस्यांसह अनेक मान्यवर उपस्थित होते.
ग्रामपंचायत सभागृहात झालेल्या बैठकीत कोरोना प्रतिबंधक उपाययोजना, बेजबाबदार नागरिकांवर आवश्यक कारवाई, तपासण्या व बाधितांचे विलगीकरण यासह विकासाच्या मुद्द्यांवरही चर्चा होऊन विकासकामांबाबत शक्य त्या सहकार्याची ग्वाहीही प्रशासनाकडून देण्यात आली.
पानंद रस्ते खुले करण्याची चांगली योजना आहे. रस्ता नसल्यास शेतकऱ्यांना अनेक अडचणीला सामोरे जावे लागतो पानंद रस्ते खुले झाल्यानंतर शेतकरी अनेक अडचणींतून मुक्त झाले.
मिलिंदनाना हरगुडे
माजी सरपंच केसनंद
" गावागावांत सलोखा व प्रगती साधण्यासाठी पाणंद रस्त्यासारख्या कामांबाबत शेतकऱ्यांनी हेवेदावे विसरुन एकदिलाने कामे करणे आवश्यक असून, कोरोनाप्रतिबंधासाठीही नागरिकांचे सहकार्य गरजेचे आहे.
डॉ. राजेश देशमुख, जिल्हाधिकारी, पुणे
पालकमंत्री पाणंद रस्ता योजनेत अतिक्रमित रस्ता खुला करणे, कच्चा रस्ता तयार करणे तसेच कच्चा रस्ता पक्का करणे, या तीन घटकांचा समावेश असून यासाठी, शेतकऱ्यांचे सह्कार्य अपेक्षित असते.
विजयकुमार चोबे, तहसीलदार, हवेली.
केसनंदमध्ये वाढत्या नागरीकरणामुळे महत्त्वपूर्ण अशी पिण्याच्या पाण्याची मोठी योजना, अष्टविनायक महामार्गालगतची सुसज्ज ड्रेनेज व्यवस्था तसेच घनकचरा व्यवस्थापनाचा प्रश्न प्रशासनाने प्राधान्याने मार्गी लावावा.
मिलींदनाना हरगुडे, माजी सरपंच, केसनंद.
केसनंद, येथे अनेक वर्षे प्रलंबित असलेल्या एक किलोमीटर लांबीच्या पूर्व-पश्चिम अशा पाणंद रस्त्याच्या कामाचा शुभारंभ जिल्हाधिकारी डॉ. राजेश देशमुख यांच्या हस्ते करण्यात आला. या प्रसंगी उपस्थित मान्यवर.