---
उरुळी कांचन : गेल्या वर्षभरापासून कोरोना संकटातही महावितरणच्या पुणे परिमंडलाने उल्लेखनीय कामगिरी करीत घरगुती, व्यावसायिक, औद्योगिक व इतर वर्गवारीतील तब्बल १ लाख ४९ हजार ७८३ नवीन वीजजोडण्या कार्यान्वित केल्या आहेत. यामध्ये १ लाख ९ हजार ०१९ नवीन वीजजोडण्या मार्च अखेरपर्यंत, तर विशेष म्हणजे कोरोनाच्या दुसऱ्या लाटेमुळे संचारबंदी सुरू असताना दि. १ एप्रिल ते १५ मे या दीड महिन्यात तब्बल ४० हजार ७६४ नवीन वीजजोडण्या देण्यात आल्या आहेत अशी माहिती मुख्य अभियंता सचिन तालेवार यांनी दिली.
मागील वर्षी मार्चमध्ये कोरोनाच्या पहिल्या लाटेमुळे जूनपर्यंत लॉकडाऊन असल्याने नवीन वीज जोडण्याचा वेग मंदावला होता. त्यानंतर पुणे परिमंडलामध्ये नवीन वीजजोडण्या देण्याच्या कार्यवाहीला वेग देण्यात आला. गेल्या आर्थिक वर्षात पुणे शहरात ४१४२५ घरगुती, ६२५३ वाणिज्यिक, ६४३ औद्योगिक व ३०९ इतर अशा एकूण ४८ हजार ६३० जोडण्या देण्यात आल्या आहेत. पिंपरी- चिंचवड शहरामध्ये २४३८१ वाणिज्यिक, ७६२ औद्योगिक व १६० इतर अशा एकूण २८ हजार ५३२ आणि मुळशी, वेल्हे, हवेली (ग्रामीण), मावळ, राजगुरुनगर, आंबेगाव, जुन्नर तालुक्यामध्ये २७६०० घरगुती, ३०७४ वाणिज्यिक, ८०२ औद्योगिक व ३८१ इतर अशा एकूण ३१ हजार ८५७ नवीन वीजजोडण्या कार्यान्वित करण्यात आल्या आहेत.
एप्रिलपासून कोरोना विषाणूच्या दुसऱ्या लाटेमुळे सध्या संचारबंदी सुरू आहे.
या आपत्कालीन परिस्थितीमध्ये एकीकडे वीजपुरवठा सुरळीत ठेवण्यासाठी अहोरात्र राबत असलेल्या महावितरणने दि. १ एप्रिल ते १५ मेपर्यंत संचारबंदीच्या खडतर काळात ग्राहकसेवेचे कर्तव्य चोखपणे बजावत तब्बल ४० हजार ७६४ नवीन वीजजोडण्या कार्यान्वित केल्या आहेत. या दीड महिन्याच्या कालावधीत पुणे शहरात १६४२५ घरगुती, २२२१ वाणिज्यिक, ११३ औद्योगिक व ७८ इतर अशा १८ हजार ८३७ नवीन वीजजोडण्या कार्यान्वित करण्यात आल्या आहेत. पिंपरी चिंचवड शहरात ७७३८ घरगुती, १२०६ वाणिज्यिक, २२२ औद्योगिक व ४७ इतर अशा ९२१३ आणि मुळशी, वेल्हे, हवेली (ग्रामीण), मावळ, राजगुरुनगर, आंबेगाव, जुन्नर तालुक्यामध्ये ११०९२ घरगुती, १३१८ वाणिज्यिक, १६७ औद्योगिक व १३७ इतर अशा एकूण १२ हजार ७१४ नवीन वीजजोडण्या कार्यान्वित करण्यात आल्या आहेत.
--
कोविड सेंटर व रुग्णालयांना नवी जोडणी
यासोबतच पुणे परिमंडलातील सर्व अभियंता व कर्मचारी कोविड रुग्णालये, विलगीकरण कक्ष, ऑक्सिजन निर्मिती उद्योग व लसीकरण केद्रांना नवीन वीजजोडणी किंवा वाढीव वीजभार देण्यासाठी युद्धपातळीवर कर्तव्य बजावत आहे. कोरोना संकटाला सामोरे जात विविध ग्राहकसेवा देताना प्रामुख्याने नवीन वीजजोडणी देण्यासाठी केलेल्या उल्लेखनीय कामगिरीसाठी पुणे परिमंडलातील अभियंते व कर्मचाऱ्यांचे मुख्य अभियंता सचिन तालेवार यांनी कौतुक केले आहे. ग्राहकसेवा देताना कोविड-१९ च्या उपाययोजनांचे पूर्णपणे पालन करावे व आरोग्याची काळजी घेत कोरोनाचा संसर्ग टाळण्यासाठी सर्वाधिक प्राधान्य द्यावे असे आवाहन त्यांनी केले आहे.
---