पुढील आठ दिवस शहरासाठी ‘आत्यंतिक कसोटी’चे

डॉ. संजय ललवाणी : पुण्यातील साथीचा सध्या ''पीक''

प्रज्ञा केळकर-सिंग

लोकमत न्यूज नेटवर्क

पुणे : सध्या पुण्यात दररोज ४ हजारहून अधिक कोरोना रुग्ण आढळून येत आहेत. जिल्ह्यातील रुग्णांची संख्या ८ हजारांचा आकडा ओलांडून पुढे गेली आहे. सध्या पुण्यातील कोरोना संसर्गाचा आलेख सर्वोच्च बिंदूवर असून पुढील आठ दिवसांचा कालावधी शहरासाठी ''आत्यंतिक कसोटी''चा असणार आहे, असे भाकीत भारती हॉस्पिटलचे वैद्यकीय संचालक डॉ. संजय ललवाणी यांनी केले.

साधारणपणे १८ मार्चनंतर शहरातील लोकसंख्या ४ हजारांचा टप्पा ओलांडेल, असा अंदाज डॉ. ललवाणी यांनी १२ मार्च रोजी व्यक्त केला होता. तो अंदाज तंतोतंत खरा ठरला. पुणे पहिल्यापासूनच कोरोनाचा हॉटस्पॉट ठरले आहे. पुण्यातील रुग्णवाढीचा वेग खूप जास्त आहे. सध्या रुग्णसंख्या झपाट्याने वाढत आहे. पुढील रविवारपर्यंत रुग्णसंख्या आणखी मोठा पल्ला गाठेल. त्यामुळेच हे आठ दिवस अत्यंत महत्त्वाचे आहेत, असे भाष्य त्यांनी केले. पुण्यातील आरोग्य व्यवस्था वेगाने काम करत असल्याने आठवड्याभरात प्रसारावर नियंत्रण मिळवता येईल.

ललवाणी म्हणाले, ''सध्या एकूण रुग्णसंख्येपैकी १० टक्के लोकांना रुग्णालयात दाखल व्हावे लागत आहे आणि त्यातील १० टक्के लोकांना आयसीयूची गरज भासत आहे. लॉकडाऊन न केल्यास रुग्णसंख्येवर आपले कोणतेच नियंत्रण राहणार नाही. आताच्या मिनी लॉकडाऊनचा ३०-४० टक्के परिणाम दोन आठवड्यांनी पाहायला मिळेल. सुरुवातीच्या काळात रस्त्यावर फिरणाऱ्या लोकांकडून प्रसार होत होता. आता कुटुंबे, संपूर्ण सोसायटी ''पॉझिटिव्ह'' होताना दिसत आहेत. त्यामुळे या लॉकडाऊनने तो प्रसार कसा थांबवणार, हे पहावे लागेल. पार्शियल लॉकडाऊन साथ दिवसांपेक्षा जास्त वाढवता येणार नाही. कारण, लोक पुन्हा आपापल्या गावी परतू लागल्यास अर्थचक्र पुन्हा बिघडेल. त्यामुळे सध्या शासनाने लसीकरणावर भर देणे आणि नागरिकांनी आपणहून लसीकरणासाठी पुढे येणे आवश्यक आहे.''

-----

काय असेल मृत्यूदराची स्थिती?

सध्याची परिस्थिती गंभीर आहे. महाराष्ट्रात गुरुवारी कोरोनाने २९५ लोकांचा मृत्यू झाला. पुढील दोन दिवसांत मृत्यूचा आकडा ७००-८०० पर्यंत जाऊ शकतो. पुढील आठवड्यात मृत्यूची संख्या १००० पर्यंत जाऊ शकते. लॉकडाऊनचा परिणाम दोन आठवड्यानी दिसू लागेल आणि मृत्युदर कमी होईल.

१५ एप्रिल ते ३१ मे हा कालावधी भारताच्या दृष्टीने अत्यंत महत्वाचा आहे.

-----

12 एप्रिलपर्यंतचा प्रशासकीय अंदाज

– ऑक्सिजन विरहित फक्त 9 बेड्स शिल्लक राहतील

– 3207 ऑक्सिजन बेडची कमतरता भासेल

– 462 आयसीयु बेड शिल्लक राहतील

– 647 व्हेंटिलेटर्सची कमतरता भासेल