लोकमत न्यूज नेटवर्क
पुणे : महाविकास आघाडी असो किंवा नसो पण आगामी निवडणुकीत महापालिकेवर कॉंग्रेसचा झेंडा फडकवण्याचा निर्धार निर्धार कॉंग्रेस कार्यकर्त्यांनी व्यक्त केला.
सन २०२२ मधली महापालिका निवडणूक जिंकण्यासाठी शहर काँग्रेसने आतापासून नियोजन सुरू केले आहे. गुरूवारी (दि. २४) दुपारी झालेल्या बैठकीत सन २०२२ मधली महापालिका निवडणूक जिंकण्याची चर्चा झाली. यावेळी शहराध्यक्ष रमेश बागवे यांनी सर्व कार्यकर्ते, पदाधिकाऱ्यांना कामाला लागण्याचे आवाहन केले. प्रदेश सरचिटणीस अ‍ॅड. अभय छाजेड, माजी मंत्री बाळासाहेब शिवरकर, कमल व्यवहारे, नगरसेवक अरविंद शिंदे यांच्यासह प्रमुख पदाधिकारी, कार्यकर्ते बैठकीला उपस्थित होते.
पक्षाला शहरात पुन्हा पुर्वीचे वैभव मिळवून द्यायचे तर त्यासाठी नियोजन करावे लागेल, असे बागवे यांनी सांगितले. पक्षाच्या वर्धापनदिनापासून कार्यकर्त्यांनी निर्धार करावा. लवकरच शहराच्या प्रभागनिहाय बैठका घेण्यात येतील, त्यात दिला जाणारा मतदार गाठीभेटींचा कार्यक्रम राबवावा असे आवाहन त्यांनी केले.