भोर : भोर-पुणे रस्त्यावरील संगमनेर गावच्या हद्दीत खंडोबाचा माळ नावाने ओळखल्या जाणाऱ्या मार्गावरील अवघड वळणावर दगडाला धडक लागून झालेल्या अपघातात नारायण बांदल या नावाची व्यक्ती गंभीर जखमी झाली. या अपघातात मोटारीचा चक्काचूर झाला आहे.
या वळणावर नीरा नदीवरील नेकलेस पाॅइंट असून या विहंगम दृश्य पाहण्यासाठी आणि निसर्गाचा आनंद घेण्यासाठी पर्यटक आपली वाहने रस्त्यावर पार्क करतात. त्यामुळे येथे अपघाताचे प्रमाण वाढत आहे. या वळणावर नो पार्किंगचा फलक लावला जावा, अशी मागणी नागरिकांनी केली आहे. सोमवारी सायंकाळी या मार्गावर एमएच १२ केटी ४४६२ या मोटारकारला अपघात झाला. कार उतारावरून पलटी होत गडगडली असून मोटारीतील नारायण बांदल हे गंभीर जखमी झाले. त्यांना सह्याद्री रेस्क्यू फोर्सच्या पथकाने मदत करुन बांदल यांना तातडीने उपचारासाठी रुग्णालयात दाखल केले आहे.
राजगड पोलिसांत याविषयी गुन्हा दाखल झाला आहे. पुढील तपास राजगड पोलीस करत आहेत.
चौकट-
नेकलेस पाॅइंट येथे नो पार्किंग झोन करावा
भोर तालुक्यातील भोर पुणे मार्गावरील खंडोबाचा माळ येथील वळनावर निरानदीच्या पाण्यात नेकलेस पाॅइंटचे विहंगम दृश्य पाहण्यासाठी मोठ्या प्रमाणात पर्यटक येत असतात. मात्र, पर्यटक वाहने रस्त्यावर लावून जातात. त्यामुळे अनेकदा या ठिकाणी वाहतूककोंडी होते. शिवाय लहानमोठे अपघातही घडतात. कालच्या अपघातात कार नदीत पडता पडता वाचली. यामुळे या ठिकाणी नो पार्किंग झोन करण्याची मागणी होत आहे.
फोटो : नेकलेस पाॅइंट येथे मोटारीचा झालेला अपघात.