पुणे : अल्पवयीन मुलीचा पाठलाग करून तिचा विनयभंग केल्याप्रकरणी एका १९ वर्षीय तरुणाला न्यायालयाने सहा महिने सक्तमजुरी व दहा हजार रुपये दंडाची शिक्षा सुनावली. विशेष न्यायाधीश के. के. जहागीरदार यांनी हा आदेश दिला. दंडाची रक्कम न भरल्यास अतिरिक्त एक महिन्याचा कारावास भोगावा लागेल, असेही आदेशात नमूद करण्यात आले आहे.
अमोल घाटे असे शिक्षा झालेल्याचे नाव आहे. नोव्हेंबर व ऑक्टोबर २०१८ रोजी हडपसर परिसरात घडलेल्या घटनेप्रकरणी चौदा वर्षीय मुलीने फिर्याद दिली.
अमोलने अल्पवयीन पीडितेचा पाठलाग करून ‘मी तुझा मित्र असून मी तुला लाईक करतो. मी माझा मोबाईल नंबर देतो. त्याच्यावर व्हॉट्स्अपला हाय म्हणून मेसेज पाठव. उद्या भेटू,’ असे म्हणून पाठलाग केला, विनयभंग केला, असे फिर्यादीत नमूद करण्यात आले आहे. याप्रकरणी आरोपीला अटक करत त्याविरोधात न्यायालयात दोषारोपपत्र दाखल करण्यात आले. सरकार पक्षातर्फे विशेष सरकारी वकील अरुंधती ब्रह्मे यांनी काम पाहिले. यामध्ये त्यांनी सहा साक्षीदार तपासले. याप्रकरणात पीडिता व तिच्या मैत्रिणीची साक्ष महत्त्वाची ठरली. गुन्ह्याचा तपास हडपसर पोलीस ठाण्याच्या पोलीस उपनिरीक्षक एस. एस. गावडे यांनी केला. न्यायालयीन कामकाजात पैरवी अधिकारी आर. एन. कांबळे यांनी त्यांना मदत केली.