पुणे : दोन दिवसांत दोन ठिकाणी खुनी हल्ला करून कॅश लुटणा-या मामा-भाचे टोळीवर मोक्का कायद्याअंतर्गत कारवाई करण्यात आली आहे. हे दोन्ही गुन्हे नऊ आरोपींनी मिळून केल्याचे निष्पन्न झाले आहे. शहरात ही नवीन टोळी सक्रिय झाली होती.
पोलिसांनी दिलेल्या माहितीनुसार, दि.३ एप्रिल रोजी रात्री सव्वादहाच्या सुमारास पुणे-सातारा रोडवरील अरण्येश्वर कॉर्नर येथील सुप्रील इंडस्ट्रियल इस्टेट येथे ६ व्यक्तींनी दुकानात घुसून दुकानाचे मॅनेजर व कामगाराला रिव्हॉल्वरचा धाक दाखवत मारहाण करून त्यांच्याकडून 57,000 रुपये जबरदस्तीने हिसकावून नेले होते. याबाबत दुकानाच्या व्यवस्थापकाने दिलेल्या फिर्यादीनुसार त्यांच्यावर सहकारनगर पोलीस ठाण्यात गुन्हा दाखल करण्यात आला आहे. दि. 4 एप्रिलला 7 वाजण्याच्या सुमारास सुमारास स्वारगेट येथील लक्ष्मीनारायण थिएटरसमोर पुलाखाली एका 50 वर्षीय वृत्तपत्र विक्रेत्याला चाकूने धमकावून त्यांच्याजवळील पेपर विक्रीचे जमलेले एकूण 90,300/- रु. असलेली बॅग अनोळखी व्यक्तींनी हिसकावून नेली होती. याबाबत दत्तवाडी पोलीस स्टेशनमध्ये गुन्हा दाखल करण्यात आला.
या गुन्ह्यांचा तपास सुरू असताना दत्तवाडी पोलिसांनी गौरव फडणीस (वय 30, रा. पर्वती दर्शन, पुणे) व अक्षय गरुड (वय 20, रा. व्हीआयटी कॉलेजच्या मागे, अपर इंदिरानगर, पुणे) या दोन आरोपींना अटक केली होती. या दोघांसह सचिन पांडुरंग सोंडकर (वय 31, रा. अपर इंदिरानगर, बिबवेवाडी, पुणे), महादेव सुरेश नंदुरे (वय 20, रा. दत्तनगर, कात्रज, पुणे) चिराग संजय देशमुख (रा. खोपडेनगर, कात्रज, पुणे) यांनाही अटक करण्यात आली आहे. त्यातील चार आरोपींवर वारजे पोलीस स्टेशनमध्येही गुन्हा दाखल आहे. या आरोपींकडे पोलिसांनी आणखी चौकशी केली असता आरोपी हृषीकेश ऊर्फ हुक्या श्रीकांत गाडे (रा. व्हीआयटी कॉलेजच्या मागे, अपर इंदिरानगर, बिबवेवाडी, पुणे) याने स्वत:च्या नेतृत्वाखाली संघटीत टोळी तयार केली आहे. या टोळीवर खून, खुनाचा प्रयत्न, दरोडा टाकणे, दरोड्याचा प्रयत्न, घरफोडी, गंभीर दुखापती, अग्निशस्त्रे, घातक शस्त्रे घेऊन दहशत माजविणे यांसारखे गुन्हे करून वर्चस्व निर्माण करणे असे गुन्हे केल्याची वेगवेगळ्या पोलीस ठाण्यात नोंद आहे. आरोपी गाडे याने स्वतंत्रपणे 57 गुन्हे केल्याची अशी एकूण 66 गुन्हे केल्याची नोंद पोलिसांना आढळून आली आहे. त्यामुळे सहकारनगर पोलीस स्टेशनचे वरिष्ठ पोलीस निरीक्षक गोविंद गंभीरे यांनी या गुन्ह्याला मोक्का अंतर्गत कारवाई करण्याचा प्रस्ताव पश्चिम प्रादेशिक विभागाचे अपर पोलीस आयुक्त डॉ. संजय शिंदे यांना सादर केला. त्यांनी या प्रस्तावास मंजुरी दिली. त्याप्रमाणे या आरोपींवर मोक्का अंतर्गत कारवाई करण्यात आलेली असून या गुन्ह्याचा पुढील तपास स्वारगेट विभागाच्या सहा. पोलीस आयुक्त सुषमा चव्हाण करीत आहेत.
--------------------------------------------------------------------------------------