पुणे : मोबाईलचा हप्ता भरण्यासाठी दिलेले ५ हजार रुपये परत मागितल्याने चौघांनी तरुणाला घरात शिरून जबर मारहाण केली.
याप्रकरणी सिंहगड रोड पोलिसांनी चौघांविरुद्ध गुन्हा दाखल केला आहे. आदर्श नागनाथ माळी (रा. चव्हाणनगर, डीएसके विश्व रोड, धायरी), विशाल (रा. कोथरुड), प्रतीक वाडकर (रा. बिबवेवाडी) आणि अजय कोळी अशी गुन्हा दाखल केलेल्यांची नावे आहेत.
याप्रकरणी राजन विनोद शहा (वय २०, रा. क्रिस्टल बिल्डिंग, धायरी) यांनी सिंहगड रोड पोलिसांकडे फिर्याद दिली आहे.
राजन शहा व आदर्श माळी हे तोंडओळखीचे मित्र आहे. घटनेच्या तीन-चार दिवसांपूर्वी मोबाईलचा हप्ता भरण्यासाठी शहा याने माळी याला ५ हजार रुपये दिले होते. ते त्याने परत मागितले. या कारणावरून २८ मे रोजी रात्री अकरा वाजता शहा हे घरात असताना माळी व इतर आरोपी आले. शहा याला शिवीगाळ करून माळी याने तुला पैशाचा लय माज आला आहे. तुला मी काही पैसे देणार नाही, असे म्हणून लोखंडी हत्याराने डोक्यात मारून जखमी केले. शहा याचे मित्र वैभव तरंगे, विकास चव्हाण, हर्षद खोमणे, तुषार खसण हे भांडणे सोडविण्यासाठी आले असताना विशाल व प्रतीक यांनी वैभव याला पकडून हातातील लाकडी दांडक्याने मारून जखमी केले. खाली पाडून लाथाबुक्क्यांनी मारहाण करून शिवीगाळ करून धमकी देऊन निघून गेले. पोलीस उपनिरीक्षक तनपुरे अधिक तपास करीत आहेत.