गवताच्या पडवीला आग लागून ८६ हजारांचे नुकसान

ओतूर : पिंपळगाव जोगे परिसरातील भोईरवाडी (ता. जुन्नर) येथील शेतकरी सखाराम पांडुरंग भोईर यांच्या राहत्या घराशेजारीच सरमाडाची ताटी व वर गवताचे छप्पर होते. या गवताच्या छपराला मंगळवारी (दि २४) सकाळी साडेआठच्या सुमारास अचानक आग लागली, यात पडवीत असणारे सर्व सामान जळून खाक झाले. या घटनेत सुमारे ८६ हजार रुपयांचे नुकसान झाले आहे. गवताच्या पडवीत १० भाताची पोती, कपडे, भांडी, मोबाईल, पत्रे खिडकी लाकडी वासे व ३० हजार रुपयांची रोकड रक्कम, धान्य शेतातील पिकांना फवारणी करण्यासाठी आणलेली कीटकनाशक औषधे जळून खाक झाले आहेत. या आगीचे वृत्त समजताच पिंपळगाव जोगेच्या कोमल दाभाडे घटनास्थळी हजर झाल्या. प्रत्यक्ष पाहणी करून रीतसर पंचनामा केला असून पुढील कार्यवाही करीत आहेत.