पुणे : बिबवेवाडी परिसरात दहशत पसरविणाऱ्या गुन्हेगाराला पोलीस आयुक्त अमिताभ गुप्ता यांनी एमपीडीए कायद्यान्वये एक वर्षासाठी स्थानबद्ध करण्याचा आदेश दिला आहे.
अमन संजय दिवेकर (वय २०, रा. खडके वस्ती, अप्पर इंदिरानगर, बिबवेवाडी) असे त्याचे नाव आहे. त्याच्याविरुद्ध गेल्या ३ वर्षांत जीवघेणी हत्यारे बाळगून खुनाचा प्रयत्न करणे, जबरी दुखापत, दंगा, बलात्कार, बेकायदेशीरपणे हत्यार बाळगणे असे गंभीर ४ गुन्हे दाखल आहेत. त्याच्या दहशतीमुळे नागरिक उघडपणे तक्रार देण्यास धजावत नव्हते.
बिबवेवाडी पोलीस ठाण्याचे वरिष्ठ पोलीस निरीक्षक सुनील झावरे यांनी एमपीडीए कायद्यान्वये स्थानबद्ध करण्याचा प्रस्ताव तयार करून तो पोलीस आयुक्तांना सादर केला. अमिताभ गुप्ता यांनी या प्रस्तावाची पडताळणी करून त्याला एक वर्षासाठी स्थानबद्ध करण्याचा आदेश दिला. त्यानुसार शुक्रवारी अमन दिवेकर याला ताब्यात घेऊन येरवडा कारागृहात स्थानबद्ध करण्यात आले आहे.
पुणे शहरात दहशत निर्माण करणा-या अट्टल गुन्हेगारांवर कडक प्रतिबंधक कारवाई करण्याचे धोरण पोलीस आयुक्त अमिताभ गुप्ता यांनी अवलंबिले आहे. त्यानुसार मागील वर्षांमध्ये ११ गुन्हेगारांना एमपीडीए कायद्यान्वये स्थानबद्ध करण्यात आले होते. नव्या वर्षात ३ सराईत गुन्हेगारांना स्थानबद्ध करण्यात आले असल्याची माहिती पोलीस उपायुक्त बच्चनसिंह यांनी दिली.