पुणे : मंगळवार पेठेत दहशत पसरविणार्या अट्टल गुन्हेगारावर पोलीस आयुक्त अमिताभ गुप्ता यांनी एमपीडीए कायद्यान्वये स्थानबद्धतेची कारवाई केली आहे. परेश उदय मेहता (वय २२, रा. लक्ष्मीनारायण सोसायटी, मंगळवार पेठ) असे या गुन्हेगाराचे नाव आहे.
मेहता याने त्याच्या साथीदारांसह फरासखाना व चतु:श्रृंगी पोलीस ठाण्याच्या हद्दीत कोयता, लोखंडी रॉड, लोखंडी साखळी, सुरा या हत्याराने खून, मारहाण, दंगा, बेकायदा शस्त्र बाळगणे यांसारखे गुन्हे केले आहेत. मागील ६ वर्षांमध्ये त्याच्याविरुद्ध ५ गुन्हे दाखल आहेत. त्याच्या गुन्हेगारी कृत्यांमुळे या परिसरात सार्वजनिक सुव्यवस्थेला बाधा निर्माण झाली होती. तसेच त्याच्याविरुद्ध तक्रार करण्यास नागरिक धजावत नव्हते. वरिष्ठ पोलीस निरीक्षक राजेंद्र लांडगे यांनी एमपीडीए कायद्यान्वये परेश मेहता याला स्थानबद्ध करण्याचा प्रस्ताव तयार करून तो पोलीस आयुक्तांना सादर केला. पोलीस आयुक्त अमिताभ गुप्ता यांनी या प्रस्तावाची पडताळणी करून त्याला एक वर्षाकरिता स्थानबद्ध करण्याचे आदेश दिले.
२१ गुन्हेगारांवर कारवाई
पोलीस आयुक्त गुप्ता यांनी ८ महिन्यांत शहरात दहशत निर्माण करणार्या २१ अट्टल गुन्हेगारांना स्थानबद्ध करून त्यांची येरवडा कारागृहात रवानगी केली आहे.