बारामती : बारामती शहरासह ग्रामीण भागात देखील उदासीन कोरोनाबाधितांमुळे कोरोनावाढीचा विळखा घट्ट होताना दिसत आहे. त्यामुळे प्रशासनाने बारामती, माळेगाव हद्दीतील गावांमध्ये हाय ॲलर्ट जारी करण्यात आला आहे.
बारामती नगर परिषद, माळेगाव नगरपंचायतीसह अन्य ११ गावांमध्ये हाय ॲलर्ट जारी करण्यात आला आहे. तसेच, १५ गावांमध्ये ॲलर्ट जारी केला आहे. दररोज सरासरी ३०० ते ४०० नवे कोरोना रुग्ण आढळत आहेत. त्यामुळे प्रशासनाकडून रुग्णसंख्या वाढत असल्याने ॲलर्ट जारी करण्यात आला आहे. बारामती शहरात आजपर्यंत २० हजार ५९६, तर गेल्या ४० दिवसांत ११ हजारांपेक्षा जास्त कोरोनाबाधित रुग्ण आढळले आहेत. तर आजपर्यंत एकूण १६ हजार २७५ रुग्ण बरे झाले आहेत. ५ एप्रिलपासूनच शहरातील अत्यावश्यक सेवा वगळता सर्व काही बंद ठेवण्यात आले आहे. मात्र, ५ मेपर्यंत रु ग्णवाढीचा वेग रोखण्यास प्रशासनाला अपयश आले. कोरोनाच्या वाढत्या प्रादुभार्वाच्या पार्श्वभूमीवर बारामतीमध्ये ५ मे ते ११ मे दरम्यान लॉकडाऊन लागू आहे. यात दूधविक्रीसाठी सकाळी ते ९ वाजेपर्यंत मुभा आहे, तर मेडिकल आणि दवाखाने वगळता सर्व आस्थापना बंद ठेवण्यात येणार आहेत. किराणा, भाजी मंडई या काळात बंद राहणार आहे. मंगळवारी (दि. ११) लॉकडाऊनची मुदत संपणार आहे. त्यामुळे आणखी सात दिवस कडक लॉकडाऊन सुरु राहणार का, याकडे बारामतीकरांचे लक्ष लागले आहे. गेल्या सात दिवसांपासून सुरू असलेल्या कडक लॉकडाऊनचा काहीसा परिणाम गेल्या दोन-तीन दिवसांपासून दिसू लागला आहे.
बारामती नगर परिषदेतील हाय ॲलर्ट आणि ॲलर्टवर असणारी गावे बारामती नगर परिषद, माळेगाव नगर पंचायत, गुणवडी, मुढाळे, झारगडवाडी, होळ, कटफळ, सोनगाव, लाटे, मुरुम, काऱ्हाटी, सावळ, शिर्सुफळ. काटेवाडी, निरावागज, पणदरे, वंजारवाडी, वडगाव निंबाळकर, कोऱ्हाळे बुद्रुक, डोरलेवाडी, पिंपळी, मळद, मेखळी, सांगवी, गोजुवाडी, खांडज, मोरगाव, कन्हेरी.