लोकमत न्यूज नेटवर्क
पुणे : शहरात जबरी चो-यांबरोबरच घरफोड्यांचे प्रमाणही अनलॉकबरोबर वाढू लागले आहे. शहरातील मॉडेल कॉलनी, खडकी बाजार व हडपसर येथील वेताळबाबा वसाहतीत ३ घरफोड्यांमध्ये चोरट्यांनी ९ लाख ९ हजार रुपयांचा ऐवज लंपास केला.
खडकी बाजार येथील नीता कॉर्नर येथील बंद फ्लॅटमध्ये शिरून चोरट्यांनी सोन्या-चांदीचे दागिने व रोकड असा ६ लाख १७ हजार २७५ रुपयांचा ऐवज चोरून नेला. याप्रकरणी भावेश शांतीलाल नहार (वय ४१, रा. खडकी बाजार) यांनी फिर्याद दिली आहे.
मॉडेल कॉलनीतील स्नेह कॉम्प्लेक्समधील गोदामाचे कुलूप चोरट्यांनी तोडून २ मायक्रोवेव्ह, २ कूलर व २ एसी असा १ लाख ५९ हजार रुपयांचा माल चोरुन नेला. नीलेश गोठी यांनी चतु:शृंगी पोलिसांकडे फिर्याद दिली आहे.
हडपसर येथील वेताळबाबा वसातीतील एका फ्लॅटचे कुलूप तोडून लोखंडी पेटीत ठेवलेले १ लाख ३२ हजार रुपयांचे दागिने चोरून नेले. याप्रकरणी ताराबाई नागे (वय ६३) यांनी हडपसर पोलिसांकडे फिर्याद दिली आहे.