कंटेनरच्या धडकेत एक ठार

चाकण येथील तळेगाव चौकात भरधाव वेगात आलेल्या कंटेनरची दुचाकीस जोरदार ठोस बसल्याने दुचाकीस्वार युवक ठार झाल्याची दुर्घटना गुरुवारी

आंबेठाण : चाकण येथील तळेगाव चौकात भरधाव वेगात आलेल्या कंटेनरची दुचाकीस जोरदार ठोस बसल्याने दुचाकीस्वार युवक ठार झाल्याची दुर्घटना गुरुवारी (दि. १६ ) मध्यरात्रीच्या सुमारास घडली.आशिषकुमार गिरिजाप्रसाद गुप्ता (वय ३०, रा. भुजबळआळी, चाकण) असे या अपघातात ठार झालेल्याचे नाव आहे. या कंटेनर चालकावर शुक्रवारी (दि. १७) सकाळी चाकण पोलिसांनी गुन्हा दाखल केला आहे. कंटेनरचालक तुकाराम अंबादास सोनवणे (वय ४३, लोणार, जि. बुलडाणा) हा अपघातानंतर रात्रीच्या अंधाराचा फायदा घेऊन तसाच पुढे पसार झाला. मात्र चाकण पोलिसांनी राजगुरुनगर पोलिसांच्या मदतीने संबंधित चालकास सुमारे चौदा किलोमीटर पाठलाग करून खेड घाटातून ताब्यात घेतले आहे.अपघातात ठार झालेला आशिषकुमार गुप्ता हा चाकण मिंडा कंपनीत नोकरीस होता. कामावरून सुटल्यानंतर घरी जात असताना हा अपघात घडला. मध्यरात्री एकच्या सुमारास कंपनीतून कामावरून सुटल्यानंतर घरी निघालेला आशिषकुमार गुप्ता त्याची अ‍ॅक्टिव्हा दुचाकी (एमएच १४ एफ. झेड. ४३५३) वरून तळेगाव बाजूकडून चाकण बाजूकडे जात होता. चौकात रात्रीच्या वेळी सिग्नल बंद असल्याने घाईघाईत चौक ओलांडून पुढे जाण्याच्या प्रयत्नात असतानाच पुणे बाजूकडून नाशिककडे जात असलेल्या भरधाव कंटेनरची (एमएच १२ एच.डी. ५८३०) चाकणच्या तळेगाव चौकात सिग्नलजवळ दुचाकीस जबरदस्त ठोस बसली. यात दुचाकीस्वार आशिषकुमार कंटेनरच्या चाकाखाली चिरडून जागीच ठार झाला. अपघातानंतर संबंधित चालकाने कंटेनर तसाच पुढे भरधाव वेगात राजगुरुनगर दिशेने पळविला. अपघाताची माहिती तत्काळ काही प्रत्यक्षदर्शिंनी पोलिसांना दिली. (वार्ताहर)