ऑनलाइन लोकमत
लोणावळा, दि. ८ - मुंबई पुणे द्रुतगती मार्गावर खोपोली फुडमॉलच्या जवळील उतारावर मुंबईच्या दिशेने जाणार्‍या खाजगी प्रवासी बसला मागून जोरात आलेल्या कंटेनरने धडक दिली व उलटला. या अपघातात दोन जण जखमी झाले आहेत. सकाळी ७ वाजता किमी ३७ येथे मुंबई लेनवर हा अपघात झाला.
बोरघाटचे सहाय्यक पोलीस निरीक्षक जोशी यांनी दिलेल्या माहितीनुसार कंटेनर हा उतार असल्याने न्युट्रलमध्ये येत होता. यामुळे चालकाचे कंटेनरवरिल नियंत्रण सुटले व तो समोर चाललेल्या खाजगी प्रवासी बसला धडकला व आडवा झाला. सुदैवाने बसला जोरात धडक बसली नाही अन्यथा मोठी दुर्घटना घडली असती. अपघात झाला त्या ठिकाणी शंभर फुट खोल दरी आहे. आडवा झालेल्या कंटेनरमध्ये २६ टन माल आहे. तो रस्त्याच्या कडेला पलटी झाल्याने एक लेन बंद झाली असली तरी वाहतुकीवर फारसा परिणाम झालेला नाही.