चार लाखांच्या
फसवणुकीप्रकणी अटक
साथीदार महिला फरार
बारामती : इंदापूर येथील तोतया पत्रकाराला बारामती पोलिसांनी दणका दिला आहे. आॅनलाईन चारचाकी खरेदी प्रकरणी उमरज (ता. कऱ्हाड) येथील व्यक्तीची ४ लाखांची फसवणूक केल्याप्रकरणी या तोतया पत्रकाराला पोलिसांनी अटक केली आहे. तर त्याची साथीदार महिला फरार झाली आहे.
अप्पर पोलीस अधीक्षक मिलिंद मोहिते यांनी दिलेल्या माहितीनुसार, महेश मच्छिंद्र कदम (वय ३१, मूळ रा. काटी, ता. तुळजापूर, जि. उस्मानाबाद, सध्या रा. देसाईवस्ती, बेलवाडी, ता. इंदापूर) असे या पत्रकाराचे नाव आहे. त्याच्यासोबत प्रियांका पांडूरंग जाधव (रा. एमआयडीसी, बारामती) हिच्यावरही फसवणूक प्रकरणी गुन्हा दाखल झाला असून ती सध्या फरार आहे. याबाबत मंगळवारी (दि.१७) बारामती शहर पोलीस ठाण्यात पत्रकार परिषद पार पडली. यावेळी उपविभागीय पोलीस अधिकारी नारायण शिरगावकर, पोलीस निरीक्षक नामदेव शिंदे यावेळी उपस्थित होते.
याप्रकरणी वैभव सदाशिव लाटे (रा. भवानी पेठ, उमरज, ता. क-हाड, जि. सातारा) यांनी याबाबत फिर्याद दिली होती. ५ आॅगस्ट रोजी फिर्यादीने ओएलएक्स अॅपवर जुनी कार खरेदीसाठी जाहिरात पाहिली. त्यानुसार एक मोटार त्यांना पसंत पडली. दिलेल्या क्रमांकावर त्यांनी संपर्क केला असता महेश कदम हे त्यांच्याशी बोलले. कदम याने स्वत: पत्रकार-संपादक असल्याचे सांगितले. तुम्ही बारामतीत प्रत्यक्ष येवून मोटार पाहा असे त्याने सांगितले. त्यानुसार दि. १३ आॅगस्ट रोजी फिर्यादी हे भाऊ डॉ. विक्रांत, मित्र राजकुमार जाधव यांच्यासह बारामतीत आले. यावेळी कदम यांनी बारामती बसस्थानकासमोर त्यांची भेट घेत मोटार (एमएच१३, डीएल-७३३३) दाखवली. मोटारीतून शहरातून फेरफटका मारला. मोटारीची कागदपत्रे पाहिली असता ती प्रियंका पांडूरंग जाधव (रा. वरलेगाव, ता. दक्षिण सोलापूर) या नावे दिसून आले. ती माझी पत्नी असून तिच्या लग्नापूर्वीच्या नावावर मोटार असल्याचे त्याने सांगितले. पाच लाख रुपयांत मोटारीचा व्यवहार ठरला. त्यातील चार लाख रुपये आरटीजीएसद्वारे तर एक लाख रुपये मोटारीची एनओसी ताब्यात मिळाल्यावर देण्याचे ठरले. त्यानुसार भिगवण रस्त्यावरील स्टेट बँकेतील शाखेतून जाधव यांच्या खात्यात फिर्यादीने चार लाख रुपये पाठवले. नोटरी करण्यासाठी ते एका ठिकाणी थांबले असताना कदम हा घरी जाऊन पत्नीला घेऊन येतो असे सांगून गेला. तो परत आलाच नाही. त्याच्या मोबाईलवर वारंवार संपर्क साधल्यावरही त्याने प्रतिसाद दिला नाही. त्यामुळे फसवणूक झाल्याचे लक्षात आल्यावर फिर्यादीने पोलिसांत धाव घेतली. पोलिसांनी गुन्ह्याचे गांभीर्य लक्षात घेत तातडीने हालचाल केली. महेश कदम याला अटक केली.
फोटो ओळी : बारामती शहर पोलिसांनी चार लाखांच्या फसवणूकीप्रकरणी तोतया पत्रकाराला ताब्यात घेतले आहे.
१७०८२०२१-बारामती-१८