लोकमत न्यूज नेटवर्क
पुणे : कायद्याचा चुकीचा अर्थ लावून सोसायटी सदस्यांकडून बेकायदेशीरपणे हस्तांतरण शुल्क व अन्य रक्कम वसूल केल्याबद्दल सहकार उपनिबंधकांनी धनकवडी येथील सत्यसाईनगर सहकारी गृहरचना संस्थेवर संचालक मंडळ बरखास्त करण्याची कारवाई केली. त्याचबरोबर सदस्यांकडून बेकायदेशीरपणे घेतलेली सर्व रक्कम परत करावी, असाही आदेश दिला. त्याचे पालन केले नाही म्हणून संबंधित अर्जदाराने परत तक्रार केल्यानंतर संचालक मंडळाला रोज १०० रुपये याप्रमाणे दंडही ठोठावला.
विजय रा. कोतवाल यांनी यासंदर्भात सहकार उपनिबंधक कार्यालयाकडे तक्रार केली होती. त्यांनी या सोसायटीतील एक सदनिका थेट विकसकाकडून खरेदी केली. अशी खरेदी झाली तर हस्तांतरण शुल्क घेण्याचा काही प्रश्नच येत नाही, असे त्यांचे म्हणणे होते. मात्र, सोसायटीने ते अमान्य करून कोतवाल यांच्याकडून हस्तांतरण शुल्क म्हणून २० हजार रुपये घेतले. सभासद शुल्क ५०० रुपये असताना २ हजार ५०० रुपये आकारले. कोतवाल यांनी सदनिका खरेदी करण्यापूर्वी रंग व कन्वेन्स डीड करण्याकरिता सोसायटीने आकारलेले ५ हजार रुपये शुल्क त्यांनी द्यावे म्हणूनही सोसायटीने त्यांच्याकडे मागणी केली. कोतवाल यांनी हस्तांतरण शुल्क, सभासद शुल्क जमा करून त्याच्या पावत्या घेतल्या.
नंतर, त्यांनी या सर्व गोष्टींच्या विरोधात सहकार उपनिबंधक कार्यालयाकडे लेखी तक्रार केली. हस्तांतरण शुल्क व सदस्य शुल्क आकारणी बेकायदा आहे, असा मुद्दा त्यांनी उपस्थित केला. त्यावरून उपनिबंधक कार्यालयाने सोसायटीला नोटीस पाठवली व त्यांचे म्हणणे मागवले. सोसायटीच्या बैठकीत हस्तांतरण शुल्क व सभासद शुल्क याबाबत ठराव झाला असल्याचा युक्तिवाद सोसायटीने केला. तो अमान्य केला व कायद्यानुसार विकसकाकडून खरेदी झाल्यास हस्तांतरण शुल्क आकारता येत नाही, सदस्य शुल्क ५०० रुपयेच असावे, असे कार्यालयाने स्पष्ट केले व सोसायटीने कोतवाल यांना पैसे परत द्यावेत असा आदेश दिला, त्यासाठी मुदतही दिली.