बारामती: कोरोनासारख्या भीषण आपत्तीसोबत लढणाऱ्या महावितरणला आता ‘तौक्ते चक्रीवादळा’चा तडाखा बसला आहे. चक्रीवादळाने बारामती परिमंडलात महावितरणचे ४८ उपकेंद्र बाधित झाले आहेत. यामुळे घरगुती, वाणिज्यिक व औद्योगिकसह ३ लाख ४२ हजार ३५८ ग्राहकांचा वीजपुरवठा विस्कळीत झाला होता. मात्र, नैसर्गिक आपत्तीशीही दोन हात करणाऱ्या वीज कर्मचाऱ्यांनी काही तासांतच ४४ उपकेंद्र व ३ लाख ग्राहकांचा वीजपुरवठा सुरळीत केला आहे. तर कोविड रुग्णालये, कोविड केअर सेंटर्स, ऑक्सिजन निर्मिती केंद्रे यांच्या अखंडित वीजपुरवठ्यासाठी सर्व वीज यंत्रणा २४ तास कार्यरत आहे.
ऊर्जामंत्री डॉ. नितीन राऊत, महावितरणचे अध्यक्ष व व्यवस्थापकीय संचालक विजय सिंघल यांनी चक्रीवादळाशी संबंधित परिमंडलांना या नैसर्गिक आपत्तीचा सामना करण्यासाठी पूर्वकल्पना देऊन विभागीय पातळीपर्यंत नियंत्रण कक्ष स्थापन करुन सर्व कक्ष मुख्यालयाच्या नियंत्रण कक्षाशी कायम संपर्कात राहून आवश्यक उपाययोजना केल्या जात आहेत. पुणे, सोलापूर व सातारा जिल्ह्यांत चक्रीवादळ येण्यापूर्वीच वादळी वाऱ्यासह आलेल्या पावसाने वीज यंत्रणेला मोठा तडाखा दिला. बारामती परिमंडलात रविवारी दुपारपर्यंत मिळालेल्या महितीनुसार ५४७ विजेचे खांब कोसळले. तर १८ हजार ७७३ रोहित्र बंद पडल्याने ८६९ गावांतील वीजपुरवठा विस्कळीत झाला होता. मात्र, वीज कर्मचाऱ्यांनी अविरत परिश्रम घेऊन १५ हजार ३१९ रोहित्रांचा वीजपुरवठा पर्यायी मार्गाने पूर्ववत करुन बाधितपैकी ७९७ गावांचा वीजपुरवठा पूर्ववत केला, तर उर्वरित गावांमधीलही बहुतांश वीजपुरवठा पर्यायी मार्गाने सुरू करण्यात येत आहे.
चौकट
वीजपुरवठा पूर्ववत करताना कोविड हॉस्पिटल, कोविड केअर सेंटर्स, ऑक्सिजन प्लान्ट, इतर सर्व रुग्णालये, लशीकरण केंद्रे, मोबाईल मनोरे, पाणीपुरवठा, रेल्वेसह सर्व अत्यावश्यक सेवा यांचा वीजपुरवठा सुरळीत ठेवण्यासाठी महावितरण प्रयत्नशील असून, संचालक (संचलन) संजय ताकसांडे व प्रभारी प्रादेशिक संचालक अंकुश नाळे यांचे निर्देशानुसार मुख्य अभियंता सुनील पावडे यांनी सर्व संबंधित विभागांना वादळानंतर पर्यायी मार्गाने तातडीने वीजपुरवठा पूर्ववत करण्यासाठी साहित्य व मनुष्यबळ सदैव तयार ठेवण्याच्या सूचना दिल्या आहेत. त्यानुसार सर्व वीजपुरवठा कमीत वेळेत सुरळीत करण्यासाठी महावितरण यंत्रणा काम करत आहे.
फोटो ओळी : वादळामुळे वीज यंत्रणेचे झालेले नुकसान.