पुणे : “बाजार समित्यांमधील कायदे कडक करुन त्या अधिक सक्षम केल्या पाहिजेत. घरात ढेकणं झाली म्हणून घर जाळायचे नसते,’’ असे सांगत ८ नोव्हेंबरच्या भारत बंदला स्वाभिमानी शेतकरी संघटनेने पाठींबा जाहीर केला.
संघटनेचे अध्यक्ष माजी खासदार राजू शेट्टी यांनी सोमवारी (दि. ७) पत्रकार परिषदेत ही माहिती दिली. कृषी कायद्यांविरोधातील आंदोलन हे शेतकऱ्यांचे नव्हे तर बाजार समित्यातील अडत्यांचे असल्याचा आरोप केला जात आहे. यावर शेट्टी म्हणाले की, हा आरोप करणाऱ्या संघटना या सरकाराधार्जिण्या आहेत़
“बाजार समित्यांमध्ये सर्व काही अलबेल आहे असे आमचे म्हणणे नाही़ पण बाजार समितीच्या प्रचलित पध्दतीत पैसे कमी मिळत असले तरी शेतकऱ्यांना पैसे मिळण्याची हमी आहे़ यामुळे कायदे कडक करून बाजार समित्या अधिक सक्षम केल्या पाहिजेत,” असे शेट्टी म्हणाले. बाजार समितीसह खुल्या बाजाराला परवानगी देणे म्हणजे, बाजार समित्या दुबळ्या करणे आणि कालांतराने त्या बंद करणे हा केंद्र सरकारचा कायद्यातील बदलांमागे उद्देश असल्याचा आरोप त्यांनी केला.
चंद्रकांत पाटील हे लोकशाहीची उदाहरणे देत असतील तर त्यांनी, प्रथम कृषी कायदे मंजूर करताना हरकती व सूचना का मागविल्या नाहीत याचे स्पष्टीकरण द्यावे असे शेट्टी म्हणाले. कांदा निर्यातीवरून बोलताना त्यांनी, पिका-पिकात दुजाभाव करण्याचा सरकारला काही कारण नसून, जसे ऊसपीकाला हमी भाव मिळतो तसा इतर पिकांनाही हमीभाव निश्चित केला पाहिजे असे मत व्यक्त केले़