गुरुवर्य आबासाहेब अत्रे पुरस्कार’ डॉ. सतीश चव्हाण आणि वंदे मातरम संघटनेला जाहीर

\Sलोकमत न्यूज नेटवर्क

पुणे : दि रास्ता पेठ एज्युकेशन सोसायटीच्या वतीने किराणा घराण्याच्या ज्येष्ठ गायिका डॉ. प्रभा अत्रे यांचे वडील ‘गुरुवर्य आबासाहेब अत्रे यांच्या नावाने देण्यात येणारा पुरस्कार’ पुण्यातील डॉ. सतीश चव्हाण आणि वंदे मातरम संघटनेला जाहीर झाला आहे. सात हजार रुपये रोख आणि मानचिन्ह असे पुरस्काराचे स्वरूप आहे. तर इंदिराबाई अत्रे पुरस्काराच्या मानकरी सहायक पोलिस निरीक्षक प्रीती मोहन शिंत्रे आणि सामाजिक कार्यकर्ते शिरीष दाते ठरले आहेत. पाच हजार रुपये रोख आणि मानचिन्ह असे पुरस्काराचे स्वरूप असल्याची माहिती पुरस्कार संयोजन समितीचे प्रमुख प्रसाद भडसावळे यांनी कळविली आहे.

कोरोना काळात निर्भीडपणे सेवा बजावणार्‍या कोरोना योद्ध्यांना हे पुरस्कार देण्यात येणार असून, सर्व खबरदारी घेऊन पुरस्कारांचे वितरण डिसेंबर महिन्यात डॉ. प्रभा अत्रे यांच्या हस्ते होणार आहे. पुरस्काराचे हे नववे वर्ष आहे. डॉ. सतीश चव्हाण यांनी कोरोना काळात अनेक रुग्णांवर केलेल्या उपचाराबद्दल, प्रीती मोहन शिंत्रे यांनी प्लाझ्मा दानाचे महत्त्व पटवून देत रुग्णांना उपचारात केलेल्या सहकार्याबद्दल, तसेच वंदे मातरम संघटना आणि शिरीष दाते यांनी गरजू व्यक्तींना मदत केल्याबद्दल त्यांना हे पुरस्कार दिले जाणार आहेत, असेही भडसावळे यांनी सांगितले.

........