लोकमत न्यूज नेटवर्क
राजगुरुनगर: खेड पोलीस गुन्हे प्रकटीकरण शाखेची धडाकेबाज कारवाई करून मोटारसायकल चोरी करणाऱ्या टोळीचा पर्दाफाश केला आहे. त्यांच्याकडून १६ चोरीच्या मोटारसायकल जप्त करण्यात आल्या आहेत. ५ आरोपींना अटक करून ४ लाखांचा मुद्देमाल जप्त करण्यात आला आहे.
नवनाथ विजय पवार (वय २१ रा. माळवाडी साकुर, ता. संगमनेर), सुनील रामनाथ जाधव (रा. माणुसवाडी, रणखांब, संगमनेर), अजित रावसाहेब केदार (रा.रणखांब उपळी, ता. संगमनेर) रमेश अंबादास दुधवडे (रा. खैरेदरा, नांदुर ता. संगमनेर ), शिवाजी पोपट कातोरे (रा .जांबुत ता. संगमनेर) अशी अटक करण्यात आलेल्या आरोपींची नावे आहेत.
मागील आठवड्यात खेड पोलिस ठाण्याचे कर्मचारी दुपारी गस्त घालत असताना राजगुरुनगर येथील पाबळ रस्त्यावर दोघे दोन दुचाकींवर संशयीतरीत्या फिरताना आढळले. पोलिसांनी त्यांना थांबवून चौकशी केली. नवनाथ विजय पवार (वय २१ रा. माळवाडी साकुर, ता. संगमनेर), सुनिल रामनाथ जाधव (रा. माणुसवाडी, रणखांब, संगमनेर) असे नावे सांगुन दोन्ही गाड्या जानेवारी महिन्यात चोरल्याची कबुली त्यांनी दिली.
त्यांच्या आणखी सहकाऱ्यांना पकडण्यासाठी खेड पोलिस ठाण्याचे पोलिस निरिक्षक सतीश गुरव यांच्या मार्गदर्शनाखाली पोलिसांनी पथक तयार करून उर्वरित आरोपींना पकडण्यासाठी संगमनेर तालुक्यात सापळा लावला. अजित रावसाहेब केदार (रा.रणखांब उपळी, ता. संगमनेर) रमेश अंबादास दुधवडे (रा. खैरेदरा, नांदुर ता. संगमनेर ), शिवाजी पोपट कातोरे (रा. जांबूत, ता. संगमनेर ) यांना ताब्यात घेतले. पोलिसी खाक्या दाखविताच खेड तालुक्यातील राक्षेवाडी पाबळ रोड येथे एक ज्युपीटर मोटारसाइकल, तसेच घारगाव, संगमनेर, जुन्नर, नारायणगाव, निघोज, पारनेर, अकोले येथून १५ मोटारसायकल चोरुन आणल्याची कबुली दिली. पोलिसांनी सुमारे ४ लाखांच्या दुचाकी जप्त केल्या आहेत. पोलिस विभागीय आधिकारी अनिल लंबाते, खेड पोलिस ठाण्याचे पोलिस निरीक्षक सतीश गुरव, पोलिस निरीक्षक संजय जगताप यांच्या मार्गदर्शनाखाली या कारवाईत गुन्हे शोध पथकाचे पोलिस उपनिरिक्षक भारत भोसले, पोलिस हवालदार सचिन जतकर, निखिल गिरीगोसावी, स्वप्नील गाढवे, सुधीर शितोळे, संतोष मोरे, विशाल कोठावळे संतोष शिंदे यांनी सहभाग घेतला.
फोटो ओळ: खेड पोलिसांनी मोटरसायकल चोरणाऱ्या टोळीला जेरबंद केले असून त्याच्याकडून १६ मोटारसायकल जप्त केल्या आहेत.