लोकमत न्यूज नेटवर्क
पुणे : लष्करात अधिकारी असल्याचे बनावट आयकार्ड दाखवून तरुणीला व तिच्या आईला फसवून लग्न केले. पत्नीच्या भावाला लष्करात भरती करतो, असे सांगून २ लाख रुपयांना लुबाडले. तसेच, त्यांच्या गावाकडील तरुणांना बनावट भरतीचे पत्र देऊन ५० ते ६० लाख रुपयांची फसवणूक केल्याचा प्रकार समोर आला आहे.
याप्रकरणी बिबवेवाडी पोलिसांनी योगेश दत्तू गायकवाड (रा. किशोरे, ता. कन्नड, जि. औरंगाबाद) याच्याविरुद्ध गुन्हा दाखल केला आहे.
याप्रकरणी आळंदी येथील एका २१ वर्षांच्या महिलने फिर्याद दिली आहे. हा प्रकार बिबवेवाडीत जानेवारी २०२० मध्ये घडला होता. फिर्यादी यांच्या आईला रक्तदाब व मधुमेहाचा आजार असल्याने त्यांना बिबवेवाडी येथील हॉस्पिटलमध्ये घेऊन गेल्या होत्या. प्राथमिक उचार करून त्या हॉस्पिटलसमोर रिक्षाची वाट पाहात होत्या. त्या वेळी योगेश गायकवाड तेथून जात असताना त्याच्या पँटच्या खिशातून आधार कार्ड पडले. ते फिर्यादी यांनी पाहिल्यावर ते देण्यासाठी त्यांनी आवाज दिला. आरोपीने त्यांच्याशी जवळीक साधून तो लष्करात अधिकारी असल्याचे सांगितले. लष्कराच्या गणवेशातील फोटो, बनावट आयकार्ड दाखवून फिर्यादी यांच्या आईवडिलांचा विश्वास संपादन केला. फिर्यादी यांना खोटे बोलून त्यांच्याशी लग्न केले. त्यानंतर त्याने फिर्यादी यांना लष्करात मोठी भरती निघाल्याचे सांगितले. मुले भरण्यासाठी फिर्यादी यांच्या वडिलांकडून फिर्यादी यांच्या भावास भरती करण्यासाठी २ लाख रुपये घेतले. तसेच फिर्यादी यांच्या गावातील व बाहेरील गावातील मुलांचा विश्वास संपादन करून त्यांना लष्करामध्ये भरती करून देतो, असे सांगून त्यांच्याकडून ५० ते ६० लाख रुपये घेतले. त्यांना लष्करात भरती झाल्याबाबत बनावट भरती पत्र देऊन त्यांची फसवणूक केली़.
आरोपीविरुद्ध अहमदनगर शहरातील तोफखाना पोलीस ठाण्यात अशाच प्रकारे फसवणूक केल्याचा गुन्हा २०१९ मध्ये दाखल करण्यात आलेला आहे.
याबाबत सहायक पोलीस निरीक्षक आर. सी. उसगावकर यांनी सांगितले की, आरोपीने फसवणूक केल्याचे फिर्यादीसह १० जणांच्या तक्रारी आतापर्यंत आल्या आहेत. आरोपींने त्यांच्यापैकी काही जणांकडून १ ते ३ लाख रुपयांपर्यंत पैसे घेतले आहेत. आरोपीने जवळपास ५० ते ६० लाख रुपयांची फसवणूक केली असल्याचे तक्रारदारांनी सांगितले आहे.