लोकमत न्यूज नेटवर्क
मुंबई : पुण्यातील नामांकित बिल्डर परांजपे बंधू यांच्या विरोधात तक्रारदार वसुंधरा डोंगरे यांच्या वकिलाने शुक्रवारी दिंडोशी कोर्टात जवळपास ५४५ पानांचा 'पुरावे बॉम्ब' सादर केला. त्यामुळे परांजपे बंधूच्या अटकपूर्व जामिनावरील सुनावणी पुढे ढकलण्यात आली असून आता ती २९ जुलै रोजी करण्यात येणार आहे.
विलेपार्ले भूखंड घोटाळा प्रकरणातील फिर्यादी डोंगरे यांच्या वकिलांना कोर्टात काही कागदपत्रे सादर करायची असल्याने त्यांनी कोर्टाकडे १६ जुलै, २०२१ पर्यंत वेळ वाढवून मागितली होती. त्यानुसार शुक्रवारी डोंगरे यांचे वकील ऍड जगदीश शिंगाडे यांनी ५४५ पानी पुरावे सादर केले आहेत. यातून परांजपे बिल्डर यांनी अद्याप कशा प्रकारे लोकांची फसवणूक केली आहे याबाबतचा खुलासा आता कोर्टासमोर होणार असल्याचा विश्वास तक्रारदार डोंगरे यांना आहे. डोंगरेंनी केलेल्या आरोपात तथ्य नसून त्यांना विनाकारण जुन्याच प्रकरणात गुंतवून तसेच त्यांच्यावर गुन्हा दाखल करून त्यांना त्रास दिला जातोय, असे परांजपे यांचे वकील निरंजन मुंदरगी यांनी सांगितले होते. त्यानुसार आरोपात असलेले तथ्य जगासमोर आणण्याचा प्रयत्न डोंगरे कुटुंबीयांकडून केला जात आहे. विलेपार्लेच्या एअरपोर्ट कॉलनीतील भूखंड अनधिकृतपणे वाढवून घेतल्याचा आरोप परांजपे बिल्डर आणि जयविजय सोसायटीच्या तत्कालीन पदाधिकाऱ्यांविरोधात वसुंधरा डोंगरे (७०) यांनी केला आहे. त्यानुसार विलेपार्ले पोलिसांनी याप्रकरणी गुन्हा दाखल करत श्रीकांत परांजपे आणि शशांक परांजपे यांना पुण्यातील राहत्या घरातून ताब्यात घेतले होते.
आरोपींची कार्यपद्धती होणार उघड
'आम्ही आज पुण्यातील परांजपे बिल्डर विरुद्धच्या विलेपार्ले पोलीस ठाण्यात दाखल गुन्ह्यात दिंडोशी कोर्टात फिर्यादी यांच्या वतीने हस्तक्षेप अर्ज व त्यांचे म्हणणे मांडले आहे. त्याच्या पहिल्या ४५ पानांत फिर्यादीने अनेक गोष्टींचा उलगडा करत आरोपींची विविध प्रकरणातील कार्यपद्धती दर्शविणारी कागदपत्रे पुरावा म्हणून जोडली आहेत. ज्यात एकूण १०६ दस्त म्हणजे सुमारे साडेपाचशे पानांचा समावेश असून याप्रकरणी पुढील सुनावणी २९ जुलै, २०२१ रोजी होणार आहे.
(अॅड. जगदीश शिंगाडे - फिर्यादी डोंगरे यांचे वकील)