येरवडा : ‘भाई’ला वाढदिवसाच्या शुभेच्छा देण्यासाठी येरवडा जेलबाहेर फटाक्यांची आतषबाजी करत त्याचा व्हिडीओ सोशल मीडियावर व्हायरल केल्याचा धक्कादायक प्रकार नुकताच उघडकीस आला आहे.
खून-मारामारी अशा गंभीर गुन्ह्यांतील सराईत गुन्हेगार आकाश कंचिले याच्या वाढदिवसानिमित्त येरवडा जेलबाहेर त्याच्या समर्थकांनी फटाक्यांची आतषबाजी केली. एवढ्यावरच न थांबता या सेलिब्रेशनचे व्हिडीओ सोशल मीडियावर व्हायरल केले. या घटनेमुळे परिसरातील भाईंच्या टोळ्यांचे प्रस्थ दिवसेंदिवस वाढत आहे. येरवड्यातील गुन्हेगारी टोळ्यांची वाढती संख्या, त्यामुळे परिसरात गुन्हेगारी यावर पोलिसांनी अंकुश ठेवणे आवश्यक आहे.
आकाश कंचिले याच्यावर खून, मारामारी असे गंभीर स्वरूपाचे गुन्हे दाखल आहेत. लॉकडाऊन काळात येरवडा जेलमधून सुटलेल्या नितीन कसबे याचा शादलबाबा चौकात अवघ्या काही तासांत आकाश कंचिले व त्याच्या टोळीतील सदस्यांनी अत्यंत निर्घृणपणे खून केला होता. या खुनाच्या गुन्ह्यात त्याला अटक करण्यात आली असून तो या गुन्ह्यात येरवडा जेलमध्ये आहे.
येरवडा परिसरात असणारे त्याच्या समर्थकांची अजूनही दहशत आहे. शुक्रवार ५ फेब्रुवारी रोजी त्याचा वाढदिवस होता. त्याच्या समर्थकांनी येरवडा जेलबाहेरील एअरपोर्ट रस्त्यावर फटाक्यांची आतषबाजी केल्याचा व्हिडीओ तयार करून सोशल मीडियावरून व्हायरल केला आहे. एवढेच नाही तर ‘किंग ऑफ येरवडा’ असे इतर व्हिडीओदेखील तयार करून व्हायरल केलेले आहेत. एकंदरीतच या भाई समर्थकांना कोणाचीही भीती राहिलेली नाही. आपल्या टोळीचे वर्चस्व दाखवण्यासाठी गुन्हेगार व त्यांचे समर्थक अशा प्रकारे सोशल मीडियाचा सर्रास वापर करत आहेत. यामुळे सर्वसामान्य नागरिक दहशतीच्या वातावरणाखाली आहेत. अशा घटनांमुळे गुन्हेगार व त्यांच्या टोळ्यांची दहशत दिवसेंदिवस वाढत आहे.