सरकारी कामात अडथळा आणल्याप्रकरणी गुन्हा दाखल

याप्रकरणी ग्रामविकास अधिकारी जगन्नाथ बाबा शिदोरे यांनी मंचर पोलिसांत फिर्याद दिली आहे. याबाबत मंचर पोलिसांनी दिलेल्या माहितीनुसार, अवसरी खुर्द (ता. आंबेगाव) येथील ग्रामपंचायत कार्यलयात शुक्रवारी दुपारी साडेचारच्या सुमारास तक्रारदार ग्रामविकास अधिकारी शिदोरे, सरपंच जगदीश अभंग, ग्रामपंचायत सदस्य सचिन ढोणे गावातील विकासाच्या दृष्टीने चर्चा करत होते. त्या वेळी विशाल विलास भोर (रा. अवसरी खुर्द, ता. आंबेगाव) याने ग्रामपंचायतीमध्ये येऊन घराचा उतारा मागितला. त्यास थकीत घरपट्टी भरण्यास ग्रामविकास अधिकारी यांनी सांगितले असता विशाल भोर याने मी थकीत घरपट्टी आत्ता व यापुढे देखील भरणार नाही. तुम्हाला काय करायाचे असेल ते करा. मी तुम्हाला काम करू देणार नाही, असे म्हणत ग्रामविकास अधिकारी शिदोरे यांना शिवीगाळ, दमदाटी करत समोर असलेल्या टेबलवर जोरजोरात हात आपटत सरकारी कामात अडथळा आणला. याप्रकरणी विशाल भोर याच्या विरुद्ध ग्रामविकास अधिकारी शिदोरे यांनी फिर्याद दाखल केली आहे. पोलिसांनी गुन्हा दाखल केला असून तपास पोलीस निरीक्षक सतीश होडगर यांच्या मार्गदर्शनाखाली पोलीस नाईक गणेश डावखर करत आहे.