वाळूमाफियांत टोळी युद्धाची भीती

राहू (ता.दौंड) येथे वाळूच्या वादातून झालेल्या दुहेरी खून खटल्यातील मुख्य आरोपी संतोष संपत जगताप याला त्या वेळी खून झालेल्या सोनवने बंधूंच्या

यवत : राहू (ता.दौंड) येथे वाळूच्या वादातून झालेल्या दुहेरी खून खटल्यातील मुख्य आरोपी संतोष संपत जगताप याला त्या वेळी खून झालेल्या सोनवने बंधूंच्या भावांनी इतर साथीदारांच्या मदतीने जीवे ठार मारण्याची सुपारी दिली असल्याची तक्रार जगताप याने यवत पोलिसांत दिली आहे. सदर घटनेनंतर गुन्हेगारी क्षेत्रात खळबळ उडाली असून, टोळी युद्ध भडकण्याची शक्यता व्यक्त केली जात आहे.वाळूच्या वादातून झालेल्या दुहेरी खून खटल्यातील मुख्य आरोपी संतोष संपत जगताप बारामती न्यायालयातून जात असताना, त्याला मारण्यासाठी मागावर असलेल्या चार आरोपींना यवत पोलिसांनी खामगाव फाटा (ता.दौंड) नजीक सापळा रचून पकडले होते. सदर आरोपींकडे दोन गावठी कट्टे व दहा राऊंड मिळून आले होते.संतोष जगताप, समीर जगताप, अप्पा लोंढे, महेश लगाड़े व त्याच्या इतर २२ साथीदार यांच्या विरोधात गणेश शिवाजी सोनवने व रमेश सोपान सोनवने यांचा राहू येथे खून केल्याचा खटला सुरू आहे. संतोष जगताप हा (दि.१८) रोजी त्याचा भाऊ समीर जगताप व इतर सहकाऱ्यांसह बारामती न्यायालयात तारीख असल्याने तिथे गेले होते. न्यायालयातील तारीख संपल्यानंतर, संतोष जगताप व त्याचे सहकारी परत जात असताना सदर प्रकार घडला होता. दरम्यान, संतोष जगताप याने याबाबत यवत पोलीस स्टेशनमध्ये फिर्याद दिली असून सदर फिर्यादीत सन २०११ मध्ये सोनवने यांच्या बरोबर झालेली भांडने याचा राग मनात धरून उमेश सोनवने, अनिल सोनवने, संदीप सोनवने ( सर्व रा. राहु, ता. दौंड), महेश शेळके (रा.पारगाव, ता. दौंड), स्वप्निल शेलार (रा.देलवडी, ता. दौंड) यांनी आरोपी अशिद रशीद रियासन अली ( वय २२ , रा.सीलमपुर थाना, जे ९ , सीलमपुर, दिल्ली ६ ), दिलशान इरशाद खान (वय २३, रा. हापड रोड, जाकीर कॉलनी, नं.३२४, मेराड, उत्तर प्रदेश), जावेद नसीर खान (वय २१) यांना जीवे मारण्याची सुपारी दिल्याचे म्हटले आहे. (वार्ताहर)