लोकमत न्यूज नेटवर्क
भोर : पुणे-सातारा राष्ट्रीय महामार्गावरील खेड-शिवापूर येथील टोलनाक्यावर बनावट पावत्या देऊन वाहनचालकांची आर्थिक लूट होत असल्याचे समोर आले आहे. याबाबत एका नागरिकाने स्थानिक गुन्हे शाखेकडे तक्रार केली होती. पोलिसांनी टोल नाक्यावर स्टिंग ऑपरेशन करून टोलवरील बनावट पावतीची सत्यता बाहेर आणून रॅकेटचा पर्दाफाश केला आहे. याबाबत राजगड पोलीस ठाण्यात सात कर्मचाऱ्यांसह इतरांवर फसवणुकीचा गुन्हा दाखल करण्यात आला आहे.
खेड-शिवापूर टोलनाक्यावरील बनावट पावती देऊन नागरिकांना लुटणाऱ्या टोळीबाबत अभिजित वसंत बाबर (रा. पुणे) यांनी फिर्याद दिली आहे.
खेड-शिवापूर टोलनाक्यावर बनावट पावत्या देऊन वाहनचालकांची लूट करून फसवणूक केल्याप्रकरणी सुदेश प्रकाश गंगावणे (वय २५, रा. वी. धोम कॉलनी, ता. वाई), अक्षय तानाजी सणस (वय २२, रा. नागेवाडी, ता. वाई, सातारा), शुभम सीताराम डोलारे (वय १९, रा. जनता वसाहत), साई लादुराम सुतार (वय २५, रा. दत्तनगर, कात्रज), हेमंत भाटे, दादा दळवी व सतीश मरगजे (पूर्ण नाव व पत्ता नाही) व इतर टोलवरील कर्मचाऱ्यांवर राजगड पोलीस ठाण्यात गुन्हा दाखल करण्यात आला असून पोलिसांनी त्यांना अटक केली आहे.
अभिजित बाबर हे पुण्यातून स्वतःच्या चारचाकी वाहनातून साताऱ्याला जात असताना दि.१६ व २० फेब्रुवारी रोजी खेड-शिवापूर टोलनाक्यावर १९० आणि आणेवाडी टोलनाक्यावर १३० रुपयांचा जाताना व परत येताना टोल कर्मचाऱ्यांनी पावती दोन्हीवेळी दिली होती. अनेक वाहनचालकांना अशाच प्रकारे पावती देऊन वाहने सोडली जात होती. यावेळी बाबर यांना खेड-शिवापूर व आनेवाडी टोलवरील पावतीच्या साईजबाबत संशय आल्याने त्यांनी फसवणुकीबाबत पुणे ग्रामीणचे स्थानिक गुन्हे शाखेच्या पोलिसांना याबाबत तक्रार केली होती. याची शहानिशा करण्यासाठी बुधवारी (दि.२४) रात्री ८.३० च्या सुमारास खेड-शिवापूर व आणेवाडी टोलनाक्यावर स्टिंग ऑपरेशन करण्यासाठी दोन पथके गुन्हे शाखेने रवाना केली होती. गुन्हे शाखेचे सहायक पोलीस निरीक्षक गंधारे, उपनिरीक्षक एस. के. पठाण, नाईक सी. एस. जाधव, अमोल शेडगे, एम. एस. भगत, ए. आर जावळे यांनी कारवाई पथकात सहभागी झाले होते. पुढील तपास राजगड ठाण्याचे उपनिरीक्षक निखिल मगदूम करीत आहे.
चौकट
गुन्हे शाखेच्या पोलिसांनी सरकारी वाहन, दोन पंचासह फिर्यादीच्या वाहनात बसून खेड-शिवापूर टोलनाक्यावर सातारा बाजूकडे जाताना टोल भरून पावती घेतली. यावेळी टोल कर्मचाऱ्यांनी १९० टोल रक्कमऐवजी पावती नसेल घ्यायची असेल तर १०० रुपये द्या, अशी मागणीही केली होती. मात्र, फिर्यादीने १९० ची पावती टोलवर घेतली. यावेळी गुन्हे शाखेच्या पोलिसांनी राजगड पोलिसांच्या मदतीने टोलवरील वेगवेगळ्या लेनवरील कर्मचाऱ्यांची झडती घेतली असता त्यांच्या खिशात पावत्या आढळून आल्या. यावेळी जमा झालेल्या अनेक पावत्या बनावट असल्याचे संबंधित शिफ्ट मॅनेजरने सांगितले. याबाबत टोल व्यवस्थापक अमित भाटिया यांनी टाळाटाळ करत बोलण्यास नकार दिला.
कोट
खेड-शिवापूर टोलनाका हा भ्रष्टाचाराने माखलेला असून याची चौकशी केली तर प्रचंड घोटाळे बाहेर येतील. यासाठी खेड-शिवापूर टोलनाक्याचे ऑडिट होणे गरजेचे आहे. - ज्ञानेश्वर दारवटकर, कृती समिती निमंत्रक