पुणे : चालू व थकीत वीजबिलांचा भरणा करणे सोयीचे व्हावे, यासाठी पुणे, कोल्हापूर, सांगली, सातारा व सोलापूर जिल्ह्यांतील महावितरणचे अधिकृत वीजबिल भरणा केंद्र या महिन्यांतील सर्व सार्वजनिक सुटीच्या दिवशी कार्यालयीन वेळेत सुरू ठेवण्यात येणार आहे.
पश्चिम महाराष्ट्रातील २८ लाख ५५ हजार घरगुती, वाणिज्यिक व औद्योगिक वीजग्राहकांकडील थकबाकी सद्य:स्थितीत १३५९ कोटी ४ लाखांवर गेली आहे. यामध्ये (कंसात ग्राहक) पुणे जिल्हा (१२,९७,२२५)– ७३५ कोटी ९५ लाख, सातारा (३,१६,८२०)– ७७ कोटी ७३ लाख, सोलापूर (४,३५,२१०)– १८८ कोटी ४८, सांगली (३,२१,१५०)– १२१ कोटी ४१ लाख आणि कोल्हापूर जिल्ह्यात (४,८४,७७०- २३५ कोटी ४८ लाख रुपयांची थकबाकी आहे.
पुणे, सोलापूर, कोल्हापूर, सांगली व सातारा जिल्ह्यांतील महावितरणचे अधिकृत वीजबिल भरणा केंद्र सुरू आहेत. कोरोनाच्या दुसऱ्या लाटेनंतर संचारबंदी शिथिल करण्यात आल्याने या केंद्रांमध्ये जाऊन वीजबिल भरण्याची सोय ग्राहकांना उपलब्ध झाली आहेत. सोबतच या जून महिन्यामध्ये सार्वजनिक सुटीच्या दिवशीदेखील वीजबिल भरणा केंद्र कार्यालयीन वेळेत सुरू राहणार आहेत. तसेच लघुदाब वर्गवारीतील सर्व वीजग्राहकांना घरबसल्या महावितरणची www.mahadiscom.in ही वेबसाईट, मोबाईल अॅप किंवा इतर ऑनलाइन पर्यायांद्वारे वीजबिलांचा भरणा करण्याची सोय उपलब्ध आहे. वीजग्राहकांनी थकीत व चालू वीजबिलांचा भरणा करून सहकार्य करावे, असे आवाहन महावितरणकडून करण्यात आले आहे.