---
बाभूळगाव : वरिष्ठांना तक्रारीचा अहवाल सादर केल्याप्रकरणी इंदापूर येथील एका एसटी कर्मचाऱ्याने इंदापूर आगार व्यवस्थापाकांना त्यांच्या घरात घुसून शिवीगाळ करत जिवे मारण्याची धमकी दिली. घराच्या बाहेरील सुरक्षारक्षकालाही त्यांनी धक्काबुक्की केली आणि एका महिला कर्मचाऱ्याचा विनयभंग केला. याप्रकरणी कर्मचाऱ्यावर गुन्हा दाखल करण्यात आला. दादा संभाजी माने (रा. सुरवड, ता. इंदापूर) असे गुन्हा दाखल झालेल्याचे नाव आहे.
याबाबत पोलिसांनी दिलेली माहिती अशी की, आगार व्यवस्थापक महीबूब अब्दुल मजीद मनेर हे २२ मे रोजी सायंकाळी ७.३० च्या सुमारास त्यांच्या शासकीय निवासस्थानी असताना अचानक दादा माने हा दारूच्या नशेत तेथे आला. आगारात येऊन माझा अहवाल वरिष्ठांना सादर का केला, असे म्हणत शिवीगाळ केली आणि मला नोकरीची गरज नाही, मी तुझा मर्डर करणार, सकाळपर्यंत तुला जिवंत सोडणार नाही’ अशी धमकी दिली.
त्या वेळी सुरक्षारक्षक दीपक व्यवहारे याने दादा माने याला अडविण्याचा प्रयत्न केला तेव्हा त्यालाही दमदाटी व धक्काबुक्की केली. आगारातील महिला कर्मचारी यांनाही अर्वाच्च भाषेत शिवीगाळ करत त्यांचा विनयभंग केला. त्यानंतर सुरक्षारक्षक घटनास्थळी आल्यावर आरोपी रिक्षात बसून निघून गेला. काही वेळाने पुन्हा येऊन दमदाटी करून धक्काबुक्की करत शासकीय कामात अडथळा आणला. याप्रकरणी गुन्हा दाखल झाला आहे. पुढील तपास इंदापूर पोलीस करत आहेत.
————————————————