पुणे: उसने पैसे परत मागितल्याच्या कारणावरुन डोक्यात दगड घालून खून करणाऱ्यास अतिरिक्त सत्र न्यायाधीश एस. एन. सोनवणे यांनी जन्मठेप आणि ५०० रुपयांची शिक्षा सुनावली. तानाजी बाबूराव पांढरे (वय ४५, रा. सोलापूर) असे शिक्षा झालेल्याचे नाव आहे.
या खटल्याची पार्श्वभूमी अशी की, तानाजी पांढरे व बसवराज (वय ३५) हे दोघे सचिन अलगुडे याच्या वडापावच्या गाड्यावर काम करत होते. १३ जुलै २०१८ रोजी तानाजीने बसवराजकडून ५०० रुपये उसने घेतले होते. हे पैसे परत मागण्यासाठी बसवराजने तानाजीकडे तगादा लावला होता. त्यामुळे चिडून जाऊन तानाजीने बसवराजचा १३ जुलै २०१८ रोजी शिवाजीनगर रेल्वे स्टेशन पंप हाऊससमोर डोक्यात दगड घालून खून केला. याबाबतची फिर्याद सचिन अलगुडे यांनी पोलिसांत दिली होती. सहायक पोलीस निरीक्षक अमर कदम यांनी या प्रकरणाचा तपास करून न्यायालयात दोषारोपपत्र दाखल केले. अतिरिक्त सत्र न्यायाधीश एस. एन. सोनवणे यांच्यासमोर यावर सुनावणी झाली. सरकारी पक्षातर्फे सहायक जिल्हा सरकारी वकील अँड. रमेश घोरपडे यांनी काम पाहिले. त्यांनी दहा साक्षीदार तपासले. साक्षीदारांच्या साक्षी आणि पुराव्यावरून तानाजी पांढरे याच्यावरील खटला शाबित झाल्याने त्याला शिक्षा सुनावली. सहायक पोलीस उपनिरीक्षक विष्णू साळेकर, पोलीस नाईक दत्तात्रय मोरे, पोलीस नाईक निशांत कसबे यांनी न्यायालयीन कामकाजासाठी मदत केली.