पाटस येथे मंगळवारी (दि. २७) पहाटे मायलेकरांची गळफास घेऊन आत्महत्या झाली असल्याची वार्ता सर्वत्र पसरली होती. दरम्यान, मायलेकरांची आत्महत्या नसून खून झाला असल्याची माहिती उजेडात आल्यानंतर सर्वत्र संताप व्यक्त केला जात आहे. पाटस येथील स्वराज व्हॅली अपार्टमेंटमधील एका सदनिकेत लीना सोनवणे ह्या वैष्णवी, ओम या दोन अपत्यांसह राहत होत्या. लीना यांचा ब्युटी पार्लरचा व्यवसाय असल्याने त्यांना रात्री एका महिलेचा मोबाईल आला आणि ती महिला म्हणाली की आमच्या जवळच्या नातेवाइकाचं लग्न आहे तेव्हा आम्ही दोघी तुझ्याकडे पहाटे मेकअप करण्यासाठी येणार आहे. आम्ही पहाटे आल्यावर दरवाजा उघड. दोन महिला आणि सचिन सोनवणे पहाटे पाटसला आले. घराचा दरवाजा ठोठावताच लीनाने दरवाजा उघडताच तिला मारहाण करण्यास सुरुवात केली. या वेळी वैष्णवी आणि ओम हे दोघे भावंडं जागी झाली. लीनाला बेदम मारहाण केली. या मारहाणीत तिचा मृत्यू झाल्याने तिचा देह स्वयंपाकघराच्या खोलीत पंख्याला लटकवला तसेच ओमला मारहाण करून त्याचाही देह त्याच्या खोलीतील पंख्याला लटकावून पुरावा नष्ट करण्याचे काम आरोपींनी केले.
वैष्णवीलादेखील मारहाण केली, मात्र मी झालेला प्रकार कुणालाच सांगणार नाही, अशी ती म्हटल्यावर वैष्णवी या हत्याकांडातून बचावली. परिणामी पोलिसांचे चक्र फिरले. तपासाला वेग आल्यानंतर पहाटे घडलेली घटना पोलिसांना सांगितली असल्याने या घटनेतील सत्य पुढे आले आहे.