लोकमत न्यूज नेटवर्क
पुणे : गेल्या काही दिवसांत पुणे शहर आणि ग्रामीण भागात कोरोनाचा उद्रेक झाला असून, एका दिवसात कोरोना रुग्णांच्या संख्येने ५ हजारांचा टप्पा कधीच ओलांडला आहे. याच पार्श्वभूमीवर खबरदारीचे उपाययोजना म्हणून गर्दी टाळण्यासाठी पुणे जिल्ह्यात सार्वजनिक ठिकाणी, हॉटेल्स, रिसॉर्ट, सार्वजनिक सभागृहे, सार्वजनिक व खासगी मोकळ्या जागा, सर्व गृहनिर्माण संस्थांमधील मोकळ्या जागा येथे २८ रोजी साजरा होणारा होळी उत्सव तसेच २९ रोजी साजरा होणारा धूलिवंदन व रंगपंचमी उत्सव साजरे करण्यावर बंदी घातली आहे. या आदेशाचे उल्लंघन करणाऱ्यांवर कडक कारवाई करण्याचे आदेश जिल्हाधिकारी डॉ. राजेश देशमुख यांनी दिले आहेत.
राज्यात तसेच पुणे जिल्ह्यामध्ये कोरोना विषाणूचा प्रादुर्भाव झपाट्याने वाढत आहे. दिवसेंदिवस रुग्णांची संख्या प्रचंड वेगाने वाढत आहे. कोरोनाचा वाढता संसर्ग व प्रादुर्भाव झपाट्याने पसरण्याची शक्यता लक्षात घेता त्यावर तत्काळ नियंत्रण करणे व त्यावर प्रतिबंधात्मक उपाययोजना आखणे आवश्यक आहे. जिल्ह्यातील यात्रा, उत्सव आयोजित करण्यास परवानगी देण्याबाबत निर्णय घेण्यास जिल्हाधिकारी यांना प्राधिकृत केले आहे. त्यानुसार
जिल्ह्यातील कोरोनाचा वाढता प्रादर्भाव लक्षात घेता सार्वजनिक ठिकाणी होणारी गर्दी टाळण्यासाठी कडक उपाय योजना करण्यात येत आहेत. यामुळेच जिल्ह्यात साजरे होणारे होळी व धूलिवंदन सण उत्सव एकत्रित येऊन सार्वजनिक ठिकाणी, हॉटेल्स, रिसॉर्ट, सार्वजनिक सभागृहे, सार्वजनिक व खासगी मोकळया जागा, सर्व गृहनिर्माण संस्थांमधील मोकळया जागा येथे होळी, धूलिवंदन व रंगपंचमी हे सण उत्सव साजरे करण्यास मनाई करण्यात येत आहे.
सदर मनाई आदेशाचे पालन करून नागरिकांनी जिल्हा प्रशासनास सहकार्य करावे. तसेच सदर आदेशामधील कोणत्याही तरतुदीचा भंग केल्यास संबंधिताविरुध्द आपत्ती व्यवस्थापन कायदा-२००५ व कायद्यातील इतर तरतुदीनुसार कडक कारवाई करण्यात येईल, असे देशमुख यांनी स्पष्ट केले.