लोकमत न्यूज नेटवर्क
पुणे : ‘केअर टेकर’नेच ‘आवाज करनेका नही, नही तो काट डालूंगा’ अशी धमकी देत महिलेवर धारदार शस्त्राने वार केले. कुटुंबातील सदस्यांच्या नजरेसमोरूनच सोन्याचे दागिने आणि रोख रक्कम असा एकूण ११ लाख ५२ हजार रूपयांचा मुददेमाल चोरून नेल्याचा प्रकार घडला.
पौड रस्त्यावरील गुरूराज हौसिंग सोसायटी नंबर १ प्लॉट न ३३ जय भवानी नगर येथे ९ डिसेंबरच्या रात्री पावणेबारा ते १० डिसेंबरच्या रात्री दोन दरम्यान ही घटना घडली. संदीप हांडे असे आरोपीचे नाव आहे. यासंदर्भात सुरेश वसंत सोले (वय ७४) यांनी फिर्याद दिली आहे. पोलिसांनी दिलेल्या माहितीनुसार, आरोपी संदीप हा फिर्यादीच्या घरी ‘केअर टेकर’ म्हणून काम करतो. फिर्यादीच्या घराचे सर्व दरवाजे बंद असताना आरोपी हांडे याने मित्रांच्या संगनमताने गच्चीतील खिडकीचे गज कापून आत प्रवेश केला.
फिर्यादी आणि त्यांच्या पत्नीच्या गळ्याला कोयता आणि धारदार शस्त्र लावून धमक्या दिल्या. फिर्यादीच्या पत्नीच्या हाताला दुखापत करून दोघांना जीवे मारण्याची धमकी दिली. फिर्यादीच्या शयनकक्षातील सोन्याचे दागिने आणि रोख रक्कम असा एकूण ११ लाख ५२ हजार रूपयांचा ऐवज लुटला. या प्रकरणाचा पुढील तपास पोलीस निरीक्षक (गुन्हे) बडे करीत आहेत.
---------------------------------------------------